Anonimo

Per fin’amor ses enian

cant, car eu en loc valen

ai mes mon entendimen

4

.  .  .  .  .  .  .  .  .  .  .  .  .[-an]

e vos, bella douz’amia,

vas cui soplei noit e dia,

car vos m’avetz genz conqes

8

a bels dic e ab faig cortes.

Per qe·us voil e·us dezir tan

qe en ren als non enten,

car vos mi tenez iauzen

12

en dormen et en veillan;

per o vos am ses bauzia

qe ieu dir no·us o sabria,

e, s’aizo vertat non es,

16

ia d’amor no·m venga bes.

Dompna, eu ai dezir tan gran

de vos vezer plus soven,

qe d’un breu iorn m’es parven

20

q’eu n’aia estat un an,

tan es d’avinen paria;

e s’eu vos soven vezia,

las autras vis qi·s volgues,

24

sol q’eu vos vezer pogues.

E ges per mal ni per dan

d’autras ni per aunimen

non o dic, mas tan m’es gen

28

qant vos posc esser denan,

qe tot lo mon, s’eu l’avia

e mon poder, i daria,

per tal q’eu l’açar agues

32

q’ades vos vis, tan bel m’es.

Vostre bel cors benestan

sal Dieus con lo plus plaisen

q’eu sai e·l plus avinen,

36

e·l plus gai e·l mielz parlan,

et ab mais de cortesia

qe nul’autra q’el mon sia;

e s’eu per nom vos dises,

40

tuit conogron que vos es.

Lo cor qe·us ai ses bauzia

veiatz, bella douss’amia,

si·us platz, e non gardatz ies

44

.   .  .  .  .  .  .  .  .  .  .  .  . [-es].