Ab la genser que sia

et ab la mielhs aibida

3

mi colguey l’autre dia:

tan solamen

joguan rizen,

6

m’adormi tro al dia.

Mentre qu’ieu mi jazia

e·n sobinas mi adormia,

9

un dous baizar mi tendia

tan plazenmen

qu’enquer lo·m sen

12

e faray a ma vida.

Gaita, Dieus ti maldia,

lo filh Sancta Maria,

15

quar tant cochas lo dia;

gran paor ay

e gran esmay

18

que non i perda m’amia.

Gaita, s’ieu ti tenia,

de mas mas t’auciria;

21

ja res pro no·t tenria,

aur ni argen

ni hom viven

24

ni res que el mon sia.

Amicx N’Esteves, via!

Qu’ieu remanh vostr’amia,

27

que si·l gilos venia,

gran paor ai

e gran esmay

30

que·ns fezes vilania.