Berenguier de Palazol

Ab la fresca clardat

que mou del temps sere,

dona, et ab l’estat

que renovela e ve,

5

ai tot mon cor tornat

en la vostra merce,

e quar tant ai estat

que vezer no·us volia,

si la colpa es mia

10

et ieu m’o ai comprat.

Mas tant ai sofertat

gran dezir e sai be

que, si m’avetz desgrat,

a mon tort s’esdeve,

15

dona, per ma foudat:

quar d’amic no·s cove

que·l truep si dons irat

per nulha fellonia

e fols hom no·s castia

20

ans a trop mescabat.

Be m’avi’acordat

qu’al cor vires lo fre,

mas quan vey la beutat

e·l belh cors blanc e le,

25

graile, gras e delguat,

e·l plus azaut qu’om ve

e·l mielhs afaissonat,

totz mon cor se cambia

que de vos no·m partria

30

per nulh autr’embayssat.

Tan n’ai gran voluntat

e tant hi vey de be

e tan mi ve per grat

qu’ie·us am per bona fe;

35

e tan m’avetz trobat

ab leyal cor ancse

que vos avetz comtat

qu’ie·us aya ad amia

per plana drudaria,

40

o·y auriatz peccat.

Per vos ai oblidat,

e non per altra re,

tot quant avi’amat,

que de pauc mi sove;

45

si ai per vos camjat,

camjatz, dona, per me

vostre cors abdurat:

vulhatz ma companhia

aissi cum ieu volria

50

vos e vostr’amistat.

Mes [m’]avetz, En Bernart,

en vostra senhoria

mielhs qu’om ja non auria

ren que agues comprat.

55

Chanso, a Na Maria

diguas qu’ieu chantaria

si·n sabi’ aver grat.