Berenguier de Palazol

Dona, la genser qu’om veya,

sai, de belh aculhimen,

agradiv’a tota gen,

4

mas trop ten en gran enveya

selhs que deziron jauzir,

q’us no·i pot acosseguir

d’un an so que’n cuyd’aver

8

quoras que la torn vezer.

Ren no promet ni autreya

ni estrai ni falh ni men,

mas de no sap dir tan gen

12

q’ades cuydaretz que deya

totz vostres precx obezir;

pero, quan ven al partir,

vol sens colpa remaner

16

ab grat qu’en sap retener.

Tan gen despen e despleya

sa gran valor e so sen

q’una·l sieus laus non aten,

20

e ja nulhs hom no·m mescreya

de lauzor que·m n’auga dir,

qu’aitant hi pot hom iauzir

de bon pretz fin e de ver

24

cum en dona pot caber.

Sobre totas senhoreya

de pretz, mas tan car despen

s’amor, meravilha·m pren,

28

qui per sol sen la corteya,

cum o pot guaire sufrir;

o·s fai ab art abelhir

o ylh a qualque saber

32

don nulhs hom no·s pot valer.

Be vuelh que·m tenh’, on qu’ieu seya,

per son leyal bevolen;

si tot joy non hi aten,

36

mos cors l’aclina e·l sopleya

e·m platz tots sos bes auzir

et ajut ad enantir

sos laudes, jorn e ser

40

en totz locs, a mon poder.

Car ela denhet grazir,

so don ye·l dey grat saber,

lo grazisc a mon poder

44

Dieus me don l’ora vezer

qu’ie·lh puesca far son plazer.