Bernart de Bondeills

I.

Tot aissi·m pren    com fai als assesis,

qe fan tot so qe lurs seinhers lur di,

qe non pensan failhir ser ni mati,

tant lo crezon e tant ll’es chascus fis;

e le seinhers, qar conois certamen

qe chascus fai de grat son mandamen,

fa·ls comensar tal re, segon q’aug dir,

don prendon mort, ans q’o puescan complir.

II.

Tot eissamen    hai ieu estat aclis

e fins e francs vas amor, so·us afi,

en tot qan puec, qez anc non y failhi,

antz totas ves outra poder m’enmis.

E qan conoc qe ses tot trichamen

ll’era obligatz per far tot son talen,

fes mi tal re comensar don sospir

e don breumens crei qe m’er a morir.

III.

Quar veramen    la gensor q’om anc vis,

des qe Adams fon criatz tro aici,

et aqella qe mais ha de prez fi

e de bons aibs, mi mandet qe servis

e qe ames ab ferm cor fermamen;

et ieu com fins am l’ades finamen,

qar anc ailhors, pos la·m mandet servir,

no·m virei iorn ni·m virarai ni·m vir.

IV.

Car ses conten    faz e farai e fis

per vos, amors, so q’anc non fis per mi

ni o farai, aissi Jhesus me gi,

per tot qant anc poc aver Costantis!

Doncs, pos per vos fas tan gran ardimen,

ben er granz tortz si tant aul chauzimen

aves de mi qe ia·m laisses aucir,

pos per vos muer, e per vos puesc garir.

V.

Garir? Breumen,    si·m don Dieus so q’ie·ll qis

e·l qier encars, e doncs auiatz cossi:

qe·ll gran maltrach, qe nuech e iorn m’auci,

e·l greu turmen, qe volgestz q’ieu suffris,

mostres ades, ses tot allongamen,

a la gensor qe·m fai viure muren,

qar, pos sabra com mueir, crei qe sufrir

volra q’ieu l’am, qe ren als non decir.

VI.

Chansos, si·t plai, a Point t’en vai coren

al pro marqes del Carret, q’a prez gen

fai tot qant tainh, per q’ieu vueilh enantir

sai entre·ls pros son prez e far auçir.

VII.

E fora lai ab lui, so·l poiras dir,

mas pres mi ten la res q’ieu plus dezir.