Bernart de Rovenac

I.

Ja no vuelh do ni esmenda

ni grat retener

dels ricx ab lur fals saber,

qu’en cor ay que los reprenda

dels vils fatz mal eyssarnitz;

e no vuelh sia grazitz

mo sirventes entre·ls flax nualhos,

paupres de cor e d’aver poderos.

II.

Rey engles prec que·m entenda,

qu’ar fa dechazer

son pauc pretz per trop temer,

quar no·l play que·ls sieus defenda,

qu’ans es tan flacx e marritz

que par que sia adurmitz,

que·l rey frances li tolh en plas perdos

Tors e Angieu e Normans e Bretos.

III.

Rey d’Arago ses contenda

deu ben nom aver

Jacme, quar trop vol jazer,

e qui que sa terra·s prenda,

el es tan flacx e chauzitz

que sol res no·y contraditz,

e car ven lai als Sarrazis fellos

l’anta e·l dan que pren sai vas Limos.

IV.

Ja tro son paire car venda

no pot trop valer,

ni·s cug qu’ie·l diga plazer

tro foc n’abran e n’essenda,

e·n sian grans colps feritz;

pueys er de bon pretz complitz

s’al rei frances merma sas tenezos,

quar el sieu fieu vol heretar n’Anfos.

V.

Coms de Toloza, la renda

que soletz tener

de Belhcaire·us deu doler:

s’al deman faitz lonj’atenda,

vos e·l rey que·us es plevitz,

l’enprendemen n’er aunitz

s’ar no vezem tendas e papalhos,

e murs fondre e cazer autas tors.

VI.

Ricx homes mal yssernitz,

enuey’hom vostres malditz,

e laissera·us s’ie·us vis arditz ni pros;

mas no·us tem tan que ja menta per vos.