70.19

 

Bernart de Ventadorn

 

 

 

 

Estat ai com om esperdutz
per amor un lonc estatge,
mas era·m sui reconogutz
4 qu’eu avia faih folatge;
c’a totz era de salvatge,
car m’era de chan recrezutz;
et on eu plus estera mutz,
8 mais feira de mon damnatge.
 
A tal domna m’era rendutz
c’anc no·m amet de coratge,
e sui m’en tart aperceubutz,
12 que trop ai faih lonc badatge.
oi mais segrai son uzatge:
de cui que·m volha, serai drutz,
e trametrai per tot salutz
16 et aurai mais cor volatge.
 
Truans volh esser per s’amor,
e cove c’ab leis aprenda;
pero no vei domneyador
20 que menhs de me s’i entenda.
mas bel m’es c’ab leis contenda,
c’altra n’am, plus bel’e melhor,
que·m val e m’ayud’e·m socor
24 e·m fai de s’amor esmenda.
 
Aquesta m’a faih tan d’onor,
que platz li c’a merce·m prenda;
e prec la del seu amador
28 que·l be que·m fara, no·m venda
ni·m fassa far lonj’atenda,
que lonc termini·m fai paor,
car no vei malvatz donador
32 c’ab lonc respeih no·s defenda.
 
Ma domna fo al comensar
franch’e de bela companha;
e per so la dei mais (amar) (–1)
36 que si·m fos fer’et estranha;
(Que) dreihz es que domna s’afranha (+1)
vas celui qui a cor d’amar.
qui trop fai son amic preyar,
40 dreihz es c’amics li sofranha.
 
Domna, pensem del enjanar
lauzengers, cui Deus contranha,
que tan com om lor pot emblar
44 de joi, aitan s’en gazanha.
e que ja us no s’en planha!
loncs tems pot nostr’amors durar,
sol can locs er, volham parlar,
48 e can locs non er, remanha.
 
Deu lau qu’era sai chantar, (–1)
mal grat n’aya na Dous–Esgar
e cil a cui s’acompanha.
 
52 Fis–Jois, ges no·us posc oblidar,
ans vos am e·us volh e·us tenh char,
car m’etz de bela companha.

 

 

 

Ed. Carl Appel: Bernart de Ventadorn, Seine Lieder, herausgegeben von C. A., Halle 1915, p. 107 (XIX). – Rialto 7.vi.2002.


Mss.: xxx [Mss. oppure Ms.]

Edizioni critiche: xxx [oppure Edizione critica]

Altre edizioni: xxx [oppure Altra edizione]

Metrica: xxx

Melodia (X X): xxx [se c’è, se no togliere]

Ed. 1???: xxx [se c’è, se no togliere]

Note: xxx [se ci sono, se no togliere; Nota se è una sola; se più di una, separate da – (alt+0150)]

[xy]


BdT    Bernart de Ventadorn