70.29

 

Bernart de Ventadorn

 

 

 

 

Lo rossinhols s’esbaudeya
josta la flor el verjan,
e pren m’en tan grans enveya
4 qu’eu no posc mudar, no chan;
mas no sai de que ni de cui,
car eu non am me ni autrui,
e fatz esfortz, car sai faire
8 bo vers, pois no sui amaire.
 
Mais a d’Amor que domneya
ab orgolh et ab enjan
que cel que tot jorn merceya
12 ni·s vai trop umilian;
c’a penas vol Amors celui
qu’es francs e fis, si com eu sui.
so m’a tout tot mon afaire
16 c’anc no fui faus ni trichaire;
 
C’aissi com lo rams si pleya
lai o·l vens lo vai menan,
era vas lei que·m guerreya,
20 aclis per far so coman.
per aisso m’afol’e·m destrui,
(don a mal linhatge redui),
c’ams los olhs li don a traire,
24 s’autre tort me pot retraire.
 
Soven me rept’e·m plaideya
e·m vai ochaisos troban;
e can ilh en re feuneya,
28 vas me versa tot lo dan.
gen joga de me e·s desdui,
que d’eus lo seu tort me conclui.
mas ben es vertatz que laire
32 cuida, tuih sion sei fraire!
 
Om no la ve que no creya
sos bels olhs e so semblan,
e no cre qu’ilh aver deya
36 felo cor ni mal talan;
mas l’aiga que soau s’adui,
es peyer que cela que brui.
enjan fai qui de bon aire
40 sembla e non o es gaire.
 
De tot loc on ilh esteya,
me destolh e·m vau lonhan,
e per so que no la veya
44 pas li mos olhs claus denan.
(car) cel sec Amors que·s n’esdui
e cel l’enchaussa qu’ela fui.
ben ai en cor del estraire
48 tro que vas midons repaire.
 
Ja non er, si tot me greya,
qu’enquer fin e plaih no·lh man;
que greu m’es c’aissi·m recreya
52 ni perda tan lonc afan.
a sos ops me gart e·m estui,
e si non em amic amdui,
d’autr’amor no m’es veyaire
56 que ja mais mos cors s’esclaire.
 
Enaissi fos pres com eu sui
Mos Alvernhatz, e foram dui,
que plus no·s pogues estraire
60 d’en Bel Vezer de Belcaire.
 
Tristan, si no·us es veyaire,
mais vos am que no solh faire.

 

 

 

Ed. Carl Appel: Bernart de Ventadorn, Seine Lieder, herausgegeben von C. A., Halle 1915, p. 172 (XXIX). – Rialto 7.vi.2002.


Mss.: xxx [Mss. oppure Ms.]

Edizioni critiche: xxx [oppure Edizione critica]

Altre edizioni: xxx [oppure Altra edizione]

Metrica: xxx

Melodia (X X): xxx [se c’è, se no togliere]

Ed. 1???: xxx [se c’è, se no togliere]

Note: xxx [se ci sono, se no togliere; Nota se è una sola; se più di una, separate da – (alt+0150)]

[xy]


BdT    Bernart de Ventadorn