Bertran de Born (Anonymous?)

I.

Un sirventes farai novelh, plazen,

anc mais no·n fis: no m’en tenra paors

qu’ieu non digua so qu’aug dir entre nos

del nostre rei, que pert tan malamen

lai a Melhau, on solia tener

que·l coms li tolh, ses dreg et a gran tort;

e Marcelha li tolh a gran soan

e Monpeslier li cuget tolr’antan.

II.

Coms de Tolza, mal guazardon aten

selh que vos sier, don vei qu’es grans dolors,

quar de servir tanh qualsque guazardos;

doncs be·us servi lo reis Peire valen,

que ab sa gent vos anet mantener

e mori lai, don fo grans desconort;

pero d’aisselhs que foron al sieu dan

anatz creissen e·l rei Jacme merman.

III.

Al comte dic, non aia espaven,

de Proensa, qu’en breu aura socors

[d]el nostre rei, quar trop n’es coratgos

que li valha, quan n’aura mandamen

sai en Chiva, pero ieu·lh fatz saber

qu’En Berenguiers li a·l castelh estort

e dis que reis que lo sieu vai donan

ni s’en torna, fai costuma d’efan.

IV.

Comte d’Urgelh, assatz avetz fromen

e civada e bos castelhs ab tors,

ab que de cor no siatz temeros!

E demandatz al rei tot l’onramen

de lai d’Urgelh que soliatz tener

e no·i guardetz camp ni vinha ni ort,

e si no fagz, ja l’autra sanh Johan

no veiatz vos, s’el mieg non faitz deman.

V.

Bona domna, ie·us am tan lialmen

que, quan no·us vei, cuja m’aucir amors,

e quan vos vei, sui ta fort temeros

que dir no·us aus mon cor, tal espaven

mi pren de vos, no·us fezes desplazer;

doncs que farai, dona, qu’en breu sui mortz

en dret d’amor? Qu’autra non vuelh ni·n blan,

e quan vos vei, no vos n’aus far semblan.

VI.

Lo nostre reis assatz a de poder

mest Sarrazis, mas lai devas Monfort

volgra vezer hueimais son auriban

contra totz selhs qui·l van d’onor baissan.