Bertran de Preissac (88.1)

		Bertran de Preissac
		Eras, quan plou et iverna
		e fresca aura e buerna
		s’atrai e chai e despuelha la verna,
		fas sirventes per esquerna
5		d’amor, qu’enaissi s’enferna
		que las joves an levad’a taverna.
		Tant an apres de falterna
		que lur cons vendon a terna:
		plus son arden non es lums en lanterna.
10		Domnas tozas, sofrachozas, la vera paterna
		vos cofonda, e·us rebonda selh que·l mon governa!
		Qu’en Jausbertz non es tan certz, per los sanhs de Palerna,
		qu’el pantais del pel no·i lais, si sec la vostr’esterna.

		Audebert, si de ma scola
15		issetz, pareis causa fola.
		Si las crezetz, no·us tenra pro mola;
		qu’ieu fui ja de lur corola
		e sai cum quascuna dola:
		mais volon raubar qu’Aspes que degola.
20		Ges raca pieitz non asola
		qu’elhas fan, s’om lor acola.
		Neis en mostier no·n pot gandir estola!
		Qui·n joventa met s’ententa no sap qu’es virola:
		mas en guerra met sa terra selh que las percola.
25		Tan son leas lur galeas que lais ni viola
		no lur auta, mens de rauta, don quascuna tola.

		Jovens torn’en «no m’en calha»
		et amors en cominalha,
		mas las joves en trazon lur vitalha;
30		mas per nient se trebalha
		mos Audebertz que lur valha,
		quar desse l’auran mes tot en la palha.
		E par ben que sens li falha
		qui donas joves engalha
35		ab las vielhas, que an pretz ses baralha
		quar gent gabon e pueis sabon far per qu’om mais valha:
		bona pauza e ses nauza e rica gazalha.
		Mas tozeta, que·l prometa, no·n perdra mezalha,
		anz assaia cum dechaia son drut en nualha.

40		Ben a de sen gran nescieira
		drutz que dona joven quieira,
		que·l plus manen fai tornar en paubrieira;
		mas selhas de mieja tieira
		deu hom ponhar cum conquieira
45		lur amistat, quar an proez’entieira.
		Quon plus es de jorns plenieira
		val mais en tota manieira.
		Quar no desiron ges mercat ni fieira,
		lur companha es gazanha. Enanz qu’om so mieira,
50		bon’alberga qui que·s perga, fara voluntieira.
		Aital osta meins de costa, vuelh mais que no·m quieira:
		melhs mi colga e m’afolga que joves guerrieira.

		Er no sai cum me captenha:
		si·m lais d’amar o m’en fenha;
55		d’estz dos afars m’es ops que·l melhor prenha.
		Amors, e mals glais vos senha
		e selh qu’en vostra cort renha!
		Quar non etz tals que midons s’en destrenha?
		Chaitius sui qu’elha no·m denha
60		amar, per que sieus devenha;
		e si·m destrenh plus que fuecx no fai lenha.
		Men sui savis que gramavis qui la gent essenha,
		qu’ai tal anta per garanta que no s’endevenha.
		Dieus mi noga, si no·m loga joves e no·m senha,
65		si tal nova non cug mova, don ja bes no·l venha.