Bertran de Preissac  ·  Gausbert de Poicibot

Jausbert, razon ai adrecha

s’auzes descobrir mon sen

ni demostrar a prezen

d’amor cum cueill fola decha.

Ben sai que son dan esplecha

drutz qu’en dona jove·s pren;

mas qui en vieilla s’enten

mord ades quan lo fols lecha.

Bertran, en vida destrecha

avetz estat lonjamen;

mas ieu mantenrai joven

e vostra razos er brecha:

quar domna vieilla ni secha

non a pretz mest nostra gen,

e dizetz tal faillimen

don devetz morir ab flecha.

Jausbert, drudari’ es morta

en las joves, qu’ieu o sai,

e proeza no·i es mai,

abans n’es la claus estorta.

mas qui ab vieilla·s deporta

suavet sojorn’e jai,

e ieis d’afan e d’esmai

cui vieilla met dins sa porta.

Bertran, ben sec via torta

qui de vieilla·s met en plai;

mas cui las joves fan jai

jois e jovens lo conorta.

E fos pendutz ab redorta

qui ja met en vieilla bai!

Q’ieu conosc que miells l’estai

qui ab joves se conforta.

Jausbert, qui las joves prega

non es luenh de follejar,

qu’elas vivon de raubar

plus qu’Aspes qui cor ab ega;

per que mos cors las abnega,

mas de tal vieilla m’ampar

que·m fassa matin disnar,

ans que·m lais ir una lega.

Bertran, ben es causa pega

qui, per son cors esfrugar,

se vol de vieilla logar;

per qu’ieu ab lor no vueill trega.

E fa mal qui drut non nega

qui mais vol penre que dar

et ab vieilla·s vai colgar.

Quar non jai ab una sega?

Jausbert, diables l’agacha

qui de las vieillas ditz mau,

quar tant an lor pretz cabau

que las joves n’an sofracha,

quar putia las empacha

e vendon lor cons a frau;

e tot s’emporta la clau

qui plus deniers i destacha.

Bertran, fols es qui s’estacha

ab vieill’e tira jornau;

qu’ieu am mais un bon chivau

cavalgar que una vacha

ni roncin ab sella fracha.

E vos tenc ben per babau

e no vos tenc per leiau:

anz mentetz cum s’eratz gacha.

Jausbert, per vieillas m’esjau

que·m dan vin esperitau

e capons ab carn de vacha.

Bertran, ja vieill’ab pot blu

no·m baize per son ostau,

quar la pel a moll’e flacha.