Folquet de Lunel  ·  Guiraut Riquier

Guirautz, don’ap beutatz granda

tota sola jatz

en un lieg, e selh que·l platz

4

jatz n’en autre, ses demanda

que l’us a l’autre no fay,

et amo·s de cor verai:

si·l cavaiers se lev’ab lieys jazer,

8

o ilh ab luy, cal li deu mai plazer?

S’ieu laissava per pueg landa

semblaria fatz,

Folquetz, e soy m’acordatz,

12

pus entr’els amors s’abranda

e demans no s’i eschai,

c’al aiman deu plazer may

qu’elh an vas lieys et ela que·l n’esper,

16

que s’ilh a luy vay ses s’amor querer.

En G<uirautz>, dretz es que blanda

la dona l’amatz

amicx, pero pus assatz

20

li deu plazer, s’amor manda

la dona, que se·n an lay

o sos fis amans se jay;

car amors pren en totas res poder:

24

non la·n deu hom blasmar si·l vay vezer.

Folquetz, fin’amors comanda

c’amans afinatz,

pus s’es a don’autreyatz,

28

li port tot onor sens ganda,

et yeu que conosc e say

que non tanh fassa qu’il play

ela, ni el non o deu pas voler,

32

ans seretz vos blasmatz del mantener.

En Guirautz, de temor branda

·l fis enamoratz

que non auza far sos gratz

36

tant que s’an colcar a·rranda

de sidons; e s’ilh maltrai

per s’amor, s’ela se·n vay

al cavayer no fay so non-dever,

40

pus que conoys qu’ilh n’estay per temer.

Vostra razos es truanda,

Folquetz, car mandatz

temer l’aman, pus l’es datz

44

locx on sos jauzirs s’espanda;

sembla que del joys s’esmay,

e dizetz, de que·m desplay,

que·l dona·s va·n luy per son dever;

48

vos et ilh duy devetz vergonh’aver.

Be·l senhers, c’a pretz veray

de Canpendut, s’a luy play

jutg’, en Guirautz, si deu melhor saber

52

al cavayer s’il vay sidons vezer.

Folquetz, son dig ne vuelh may

que d’autre, car bon dreg vay,

qu’el sap d’amors e d’als far son dever

56

e sabra·n grat et honor conquerer.