Folquet de Marselha (155.7)

		Folquet de Marselha
		Chantars mi torna ad afan
		quan mi soven d’En Barral,
		e pois d’amor plus no·m cal,
4		no sai com ni de que chan;
		mas quecs demanda chansso
		e no·il cal de la razo:
		c’atressi m’es ops la fassa
8		de nuou, cum los motz e·l so;
		e pois forssatz, ses amor
		chan per deute de follor,
		pro er mos chans cabalos
12		si non es avols ni bos.

		Amador son d’un semblan
		e·l ric cobe d’atretal,
		c’ades ab dolor coral
16		mermon lor joi on mais n’an:
		qu’en luoc de fenestra so
		que merma s’om i apo;
		on plus pren quecs so que cassa
20		plus a del segre ochaiso;
		per qu’ieu teng cel per meillor
		que rei ni emperador
		qui celz mals aips vens amdos
24		que vensso·l plus dels baros.

		Bon fora s’om prezes tan
		Dieu cum si ni ben cum mal!
		mas so prez’om que no val
28		e son pro ten hom a dan;
		per qu’ieu no·us aus vostre pro
		dir chantan, que no sap bo
		al segle, ni cre que·l plassa
32		qui·l di ren si so mal no;
		mas pero la deshonor
		posc dir si·l turc entre lor
		son vencut ni baissat jos,
36		pois tuich vencut venson nos.

		Be·ns vensson, puois nuill deman
		non fam de l’anta mortal,
		e si nos fossem leial
40		tornera·ns ad honor gran;
		qu’us cortes geins de Dieu fo
		que·il ric trobesson perdo,
		que·s fan plus frevol de glassa
44		qui d’astinenssa·ls somo;
		mas, conqueren ab lauzor
		n’a Dieus pres en son labor
		mains que ja confessios
48		no·il plagra s’aquo no fos.

		Doncs, nostre baron que fan
		ni·l reis engles, cui Dieus sal?
		Cuida aver fait son jornal?
52		Mout i aura lait engan
		s’il a fait la messio
		et autre fai la preiso:
		que l’emperaire·s percassa
56		cum Dieus cobres sa reio!
		que primiers cre que·i socor
		si Dieus li rent sa honor:
		be·s taing, tant es rics lo dos,
60		c’aitals sia·l guizerdos.

		[Al rei frances lau refassa
		·l tornar, c’om no·l teng’a bo;
		per qu’eu dic, s’era·i socor
64		qu’es ops, que no·s don paor,
		e s’ar no·i vai qu’es saisos
		dic c’aunit[z] es per un dos.]

		N’Aziman mout mi sap bo,
68		e mout en pretz mais valor
		c’ab En Barral, mon seignor
		es mortz pretz e messios
		aissi cum s’anc res non fos.

72		En Totztemps, et ieu e vos
		em l’us per l’autre joios.