Gaucelm Faidit

I.

Chascus hom deu conoisser et entendre

que riquesa ni sens ni cortesia

que sia el mon no·ns pot de mort defendre,

c’al iorn c’om nais comenssa a morir

e qui mais viu plus poigna de fenir;

doncs ben es fols cel qu’en sa vida·s fia,

si be·s penssa de prion sa folia,

car nos es tost lo gentils cors faillitz

d’una valen comtessa Biatritz.

II.

Donc negus hom no pot per dreich contendre

oimais, en tan con Dieus ten en baillia,

non puosca mais sa part de valor rendre,

d’enseignamen ni d’aut cor, don dei dir;

e puois Dieus, se de mort non volc garir

cui totz los bes del mon complitz avia,

ia non fara als autres seignoria,

que tuich morrem e qui mais er grazitz

ni plus ama·l segle mais n’er trahitz.

III.

Con ausam donc aquesta mort atendre

can adobat trobam a chascun dia

que nostra mort podem en vida rendre?

Car Dieus nos ditz que l’anem lai servir

on El fo mortz per nos dampnatz garir;

e qui morir per lui vengar volria,

cobran son dreich qu’a perdut en Suria,

ab gran razon venria gen garnitz

al iutgamen lai on er Iesu Cristz.

IV.

Qui per Dieu vai l’aver e·l cors despendre

de paradis l’er uberta la via

e qui no·i vai deu baissar e dissendre

de tot’honor, car tem que Dieus l’azir

qui reman sai ni pot anar garnir,

qu’ie·n sai de tals c’avers e manentia

e diables e pechatz e bauzia

·ls a retengutz con fals avars aunitz,

guerriers de Dieu e de totz bes partitz.

V.

Ben se cuiden en las terras estendre

e far conquistz, mas autramen cuich sia,

car Dieus lo reis sap s’arbalesta tendre

e trai carrels trenchans per ben ferir

e negus hom del colp no·is pot gandir

can El s’irais e ve c’om no·s chastia;

mas, qui·l dopta ni vas Lui s’omilia,

aquel aura chapdel Sains Esperitz,

e, qui no·l fai, er en enfern punitz.

VI.

A totz degra de dolor lo cors fendre

del deseret del fill sainta Maria,

mas, co·l laire qui ve los autres pendre,

s’esforssa plus del mal ses repentir

lo mal segle, don Dieus nos lais issir

a salvamen, si con ops nos seria,

e Mon Thesaur – que lais en Lombardia –

don Dieus salut, car de totz nos es guitz,

e dels crozatz los cors e·ls esperitz.