Guilhem d’Andunza (203.1)

		Guilhem d’Anduza
		Sens ditz que·m lais de chantar e d’amor,
		foldatz que chant et en amor m’entenda,
		et ieu no sai vas qual d’amdos m’enprenda;
4		pero jovens sec ades la folor,
		per qu’ieu segrai, vueill’o no, la foldat,
		si com destreitz e forsatz per joven,
		quar ab folor cueill hom lo meillor sen.
8		Donx, si folei, no·m deu esser blasmat.

		Qu’ieu sec mon cor co·l vela·l ven que cor,
		que·l cor no vol que fas’autra fazenda
		mas sol d’amor, que·m pot esser esmenda
12		dels tortz, dels dans, del mal, de la dolor
		qu’ieu ai per vos, pros dona, sufertat
		pos anc vos vi, c’autra nuill joi no·m ren.
		E si merce ab vos non truep breumen,
16		muer e prec Dieu que·us perdo lo pecat.

		Plus fon mon cor que neus per gran calor
		e plus que fuecx m’es avis que·s comprenda.
		Sabetz per que? Dreitz es razo s’entenda:
20		per vos, c’avetz sobre totas valor,
		beutat e sen, ensenhamen e grat;
		qu’ieu cre si vis vostre cors grail’e gen
		Ypolite, que visquet castamen,
24		fora Floris de cor enamorat.

		C’anc tals beutatz no fo mais ses amor,
		be·m meravill com es que no s’essenda
		en vos amors, qu’es genser ses contenda
28		c’anc fos ni es; e son gualiador
		vas me mei hueill, e s’ill m’an galiat
		ill prendon part en lur gualiamen,
		que tals traï qu’es traitz el traïmen.
32		Donx, s’ill m’an trait, ill compron la foudat.

		Mas ieu cre be aiatz beutat major
		qu’als hueils non par el cor: que no despenda
		sa gran beutat; greu er que no·s reprenda
36		quan faillira de sa fresca color.
		Doncx no mostretz encontr’umelitat,
		si·us platz, ergueill quan plus bas deisen.
		Pero em patz sufrirai lo turmen,
40		tro digon tug per sofrir l’ai jogat.