Guillem Figueira

I.

Totz hom qui ben comens’e ben fenis

lonha de si blasm’e reten lauzor,

quar Dieus dona a bon comensador

bona forsa tan qu’es bona la fis,

ni anc ses Dieu fi ni comensamen

no vim fruchar fruyt de bona semensa;

mas selh qu’en Dieu fenis e ben comensa

ren frug de pretz e frug de salvamen.

II.

Aquest bos frugz nays primier e floris

de bona fe, e pueys quant es en flor,

bonas obras noyreisso·l ab doussor,

qu’ab la fe nays et ab obra·s noyris;

e qui d’est frug manjara veramen

voldra morir en nom de penedensa,

don er sa mortz just’ab vera naiscenza

q’el jorn com mor per Dieu nais justamen.

III.

Justamen es natz selh qui Dieus grazis,

pus justamen viu totz temps ses dolor

quan justamen ni ab doussa sabor

a·l frug manjat per que s’arma gueris;

e doncx anem trastug cominalment

manjar d’est frug qu’es la nostra guirensa;

e trobar l’em oltra mar, sens falhensa,

lai on Dieus fo mortz e vius eyssamen.

IV.

La sua mortz fo dreyturiers camis

per on devem anar tuyt peccador,

e qui morra per Dieu lo creator

viura totz temps jauzens en paradis;

quar aital mortz es vida ses turmen,

e verays frugz de Crist a cuy agensa;

per que quasqus deu aver sovinensa

d’aquest morir per viure loniamen.

V.

Dieus a somost tal frug que non peris.

Lo valent rey Frederic, mo senhor,

e totz aisselhs que per la su’amor

voldran morir e viure, somonis

qu’ano·n manjar sobre paguana gen

que descrezo Crist e sa conoyssensa,

e la vera crotz on non an crezensa,

e·l sepulcre descrezon malamen.

VI.

Senher verays Jhezus cuy son aclis,

lums dreyturiers de vera resplandor,

salvaire Crist, donatz fors’e viguor

e bon cosselh als vostres pellegris,

e·ls defendetz de pen’e de mal ven

quon ylh puescon passar senes temensa

lai per cobrar, ab la vostra valensa,

la sancta crotz e·l verai monimen.

VII.

Reys Frederics, vos etz frugz de joven,

e frug de pretz, e frug de conoyssensa,

e si manjatz del frug de penedensa,

feniretz be lo bon comensamen.