Guillem Figueira

I.

Un nou sirventes ai en cor que trameta

al enperador a la gentil persona,

qu’eras m’a mestier qu’en son servizi·m meta,

que nulhs homs pus jen de luy non guazardona;

qu’el geta lo paubre de paubreira

e·l valen melhura e reve;

per qu’es dretz qu’el gazanh e conqueira,

pos tan fay d’onor e de be;

per que cascus homs deu benezir la via

de tan bo senhor per on el va e ve,

et ieu benedic leis per ma dona Dia

e per En Taurel, car tan gen se capte.

II.

Non tenc per senat home que s’entremeta

de far a luy tort, c’om pus greu non perdona

tro que·s pot venjar; et gardas de Gayeta,

com el la destrus: fols es qui ab luy tensona

car trop es sa forsa sobreira.

. . . . . . . . . . . . . . . . . . . .

. . . . . . . . . . . . . . . . . . . . . . . . . .

. . . . . . . . . . . . . . . . . . . .

mot be s’es venjatz de la falsa clersia

e del papa, miels que son avi no fe.

Segur pot estar dedins s’albergaria,

que tug li siey guerrier li van clamar merce.

III.

En bon ponh fon natz et en bona planeta

nostr’emperador, c’om a tort ochaizona,

qu’eras son Lombartz vengutz tro a Barleta

per li rendre totz los dretz de la corona;

e Genoa li ren la ribeira

e totas las terras qu’ilh te,

e tant es issida sa baneyra

c’om no·s pot defendre a se.

Ad aital senhor tanh ben la senhoria,

car el sap be far so que·s tanh ni·s cove,

et es tan sabens d’artz e d’estronomia

qu’el ve e conois enans so que ave.

IV.

Mot fes otramar onrad’obra e neta

que Jheruzalem conques et Escalona,

que anc no·y pres colp de dart ni de saieta

can li fe·l soudan onrada patz e bona;

pueys tenc en Chipre sa carreyra

e la mostret tan bona fe

e . . . . lialtatz tan enteira

c’al don de Barut en sove,

cuy sols s’eretatz per gentil cortezia,

franc emperador que n’a tot lo cors ple,

e voyt e lavat de tota vilania,

ples de largetat; e qui·s vol, crea·n me.

V.

E qui no m’en cre, demand en a Berreta,

o al cavaier de Palma o de Cremona,

a qu’el det d’arnes cargat una carreta

e mil unsas d’aur. Ben aya c’aisi dona!

Tostems n’amaray may Figuieira,

que de luy lauzar no·s recre,

ni non ditz paraula mesongieyra

de l’emperador: que jasse

lo sans Dieu li gart tota sa manentia

si co ilh ama verai pretz e mante,

et a mi don Dieus gaug d’amic e d’amia

e don joy al comte Ramon c’onor soste.

VI.

Bel amic Taurel, vostra mercadaria

nos la vent hom mal e nos vendem la be.

VII.

Bels amics Taurel, vos e ma dona Dia

deves ben amar silh c’a nom de ric fre.