Jutje: Enric de Rodez

I.

1. Guiraut Riquier, segon vostr’essien [Guillem]
2. digatz cal fay mielhs de dos ricx baros:
3. l’us fay los sieus ricx e sos companhos
4. e non ten pro a negun’autra gen;
5. l’autre fay ricx los estrans ses tener
6. nulh pro als sieus. De cal es vostr’acortz
7. que dey’aver may de pretz ses enjan?
8. Que cant l’us met, l’autre met atrestan.

II.

9. Guilhem de Mur, lo mieihs d’est partimen [Guiraut]
10. puesc leu chauzir e mostrar mas razos,
11. que·l dregs devers ab sen ensenh’als bos
12. que·.ls sieus deu hom enrequir, ben fazen.
13. Car qui als sieus no fay be ni plazer
14. e·ls estranhs fay ricx a tot son esfortz
15. non deu esser lauzatz, al mieu semblan,
16. e sel c’als sieus fay be a pretz prezan.

III.

17. Guiraut, menr’es huey que yer vostre sen: [Guillem]
18. car sel es mays de bon pretz enveyos
19. que pus luenh fay auzir sos bos ressos,
20. e per bon laus son prezat li valen;
21. car de sel que a pretz dins son poder
22. vos dic per sert qu’es malvada la sortz
23. que vos e mil y anaretz claman.
24. L’autr’onra·ls sieus e se, pretz conquistan.

IV.

25. Guilhem, pauzat avetz premeyramen [Guiraut]
26. Que·l pretz d’aquel als sieus non es nulhs pros
27. (eras diretz corals ben par de vos),
28. e·ls dos que fay als estranhs folamen
29. cascun jorn deu mermar del sieu per ver,
30. on es servitz mal, car sos pretz es tortz.
31. E del valen que·ls sieus fay ricx donan
32. es hom cobes que·l servisca honran.

V.

33. Guiraut, totz noms a son entendemen, [Guillem]
34. per qu’en honor et en pro n’enten dos;
35. et hom bos pren en senhor cabalos
36. honor e joy cant pren gran honramen
37. e·y pren anta cant no fay son dever
38. vas sel per qui sos pretz vengr’a bos portz:
39. c’om deu amar de senhor atertan
40. son pretz co·l sieu pro, dreehura gardan.

VI.

41. De la honor e del dever hom pren [Guiraut]
42. de bo senhor c’als sieus es amoros,
43. Guilhem, honor. Er avetz dig per nos
44. que sel ses pro pren del sieu aunimen,
45. e sa guerra poira leu dechazer
46. que·l sieu n’auran gaug s’il es pres o mortz;
47. c’ab genh vol laus dels estrans per boban,
48. e sel es pros c’als sieus fay ben, aman.

VII.

49. Guiraut, sabers vos falh et yeu dic ver, [Guillem]
50. que ja del rey no say passera·ls Portz
51. N’Anfos sos laus pels sieus, que say s’espan.
52. E mosenhe n’Enricx jutje·ns chantan.

VIII.

53. Guilhems, lo reys vol als sieus pron tener [Guiraut]
54. et als autres, per bon pretz; ab esfortz
55. vos comparatz a manieyra d’efan.
56. E·l coms joves puesca·n dir son talan.

‹Jutjamen›

IX.

57. Guilhems m’a dat e Guirautz pensamen [Enric]
58. de lur tenso jutjar, don m’an somos.
59. En razos es l’us a l’autre ginhos:
60. d’est dos baros que donan engalmen,
61. Guilhems mante sel c’als estrans valer
62. vol, non als sieus, don sa razos es fortz,
63. e Guirautz sel c’als sieus fa be tot l’an
64. et als estranhs non ten pro pauc ni gran.

X.

65. E nos avem volgut cosselh aver
66. a dir lo dreg, e dizem que conortz
67. es de pretz, dars, e bos faitz, on que an,
68. mas pus fin pretz a selh qu’als sieus l’espan.