Guiraut Riquier · Envejos (248.14 = 141.1)

		Guiraut Riquier · Enveyos
		Aras s’esfors, n’Eveyos, vostre sens,
		car be·us er obs, si·l mielhs sabetz triar:
		totas las artz que per estudiar
4		pot clercx aver sabretz fondadamens,
		o·l joy d’amors vos sera tant aizitz,
		que per totas donas seretz grazitz
		que amaretz. Enpero la partida
8		que layssaretz perdetz a vostra vida.

		D’est partimen, Guiraut Riquier, breumens
		vos respondray, si tot m’es greu per far,
		c’ap cossir m’er lo dezir a layssar
12		per Mon Cristalh vergonhos e temens.
		Mays trop vuelh mays de lieis esser faizitz,
		que perdre tans de bels sabers complitz,
		car d’amor vei que neys la pus complida
16		sap pus d’enjan que gualiotz ni crida.

		Enveyos, so per c’om vieu pus jauzens
		m’avetz laissat, e·l mielhs per razonar;
		yeu me puesc far a tal don[a] amar
20		que·m fara ric, e mos naturals sens
		ab mon saber dara·m pretz qu’er auzitz,
		e vos vieuretz ab las set artz marritz,
		que·us torbaran la vista e l’auzida
24		co fay a motz, tant que·l sens lur n’oblida.

		Per Dieu, Guiraut, jes no soi penedens
		de so c’ay dig, car lo mielhs es, so·m par,
		e puesc vos o per yssample proar,
28		c’avetz auzit de motas de las gens
		que·l rey David e Samson fon traitz,
		e Salomon e ‹E›ro‹d›s, segon c’om ditz,
		per fol’amor fon lor valor delida.
32		Si s’er de vos, si Dieus no·us n’es gandida.

		On mais parlat, val vostra razos mens,
		n’Enveios, car no sabetz ben pauzar
		c’ab fol’amor deu totz hom mescabar,
36		si·s feron tug aquilh; e·l partimen[s]
		ditz c’a mi er ses tot embarc joy guitz.
		Mas vos blasmatz donas com descauzit:
		be·us valran pauc las artz, pus sens no·us guida,
40		car senes sens es sciensa delida.

		Guiraut, nulh hom, si non es conoissens
		e si non a sen en so que deu far,
		non pret un huou ni hom no·l deu prezar;
44		mas hom savis es prezat veram‹e›ns
		et en totz locx onratz et aculhitz;
		e vos, Guiraut, remanret escarnit,
		et er pus greu vostr’arma escarnida:
48		coverte·us donc, o non avetz gandida.

		Enveios, Peire de Fraisse, qu’es guitz
		de bel saber, vuelh jutje nostre dit,
		car so qu’ieu dic es mielhs d’esta p‹a›rtida,
52		si be·us parlatz ‹c’›arma s’en de‹s›abrida.

		Guiraut, lo dreg vuelh sia esclarzitz
		per el, car es de bel sabers complitz,
		car ma partz es en dreg pus afortida
56		que la vostra e par a la fenida.