Rialto

192.2a = 147.2

 

   

Gui de Cavaillon  ·  Falco

 

 

 

 

    Falco, en dire mal
    vey qu’es trop abrivatz;
    e fos ne causigatz,
4   e portatz ne·l senhal.
    E digatz me per cal
    fos de claustra gitatz,
    que, can monge senhatz
8   laissa l’orde que te,
    pueys prez’ om mens sa fe,
    qu’ieu n’ay auzit clamor.
    E digas me per que
12   yssitz del refreitor.
     
    Senher, a vos que val
    dir enuetz ni foltatz?
    Que res no·y gazanhatz,
16   que·us puesc dir atertal,
    qu’el vostre paubr’ostal
    vieu hom d’avol percatz,
    e·l vestir car compratz,
20   que·l coms N’Anfos vos fe,
    don s’es clamatz a me
    car non l’en faytz honor,
    pus per autruy merce
24   vivetz a desonor.
     
    Falco, mens que no val
    vielh vestir refuydatz
    val joglar eslengatz;
28   s’a vos non era mal,
    be·us det lo colp mortal
    aquel que·us dis: “Badatz”;
    e car trop parlavatz
32   mes vos hom aytal fre;
    e·l marques o fes be,
    que nessi trobador
    deu hom, can ditz per que,
36   castiar ab razor.
     
    Senher, si Dieus mi sal,
    mays am esser talhatz
    de razor que tocatz
40   de la vostra destral;
    Senher Guy, c’ad un pal
    degratz estre crematz
    per los mortals peccatz
44   c’avetz fatz far ancse;
    per qu’es fols que mante
    destral am ta mal mor,
    can als seus ni a se
48   non tenc fe ni amor.
     
    Falco, vostre captal
    perdetz can fos desfaytz,
    per que tornes cochatz
52   servir al espital;
    e s’el yvern coral
    es nutz ni despulhatz,
    las tavernas e·ls datz
56   ne reptatz mays que re,
    e·l senhal c’om no·us ve,
    que prezetz per folor,
    c’aquest guerriers, so cre,
60   Falco, vos son pejor.
     
    Pejor guerrier no cal
    a totz vostres conhatz
    que vos lor es estatz,
64   a joc descominal;
    c’anc non gardetz lur sal,
    si be·us fos adobatz,
    ni d’espaza senchatz,
68   Senh’ En Gui, del comte,
    don enquer vos sove,
    N’Anfos vostre senhor,
    don ac man palafre
72   ses fre vostra seror.

 

 

 

Testo: Ricketts 2000. – Rialto 11.x.2004.


Ms.: R 34v.

Edizioni critiche: David J. Jones, La Tenson Provençale, Paris 1934, p. 83; Peter T. Ricketts (ed.), Contributions à l’étude de l’ancien occitan: textes lyriques et non-lyriques en vers, Birmingham 2000 (AIEO, 9), p. 24.

Metrica: a6 b6 b6 a6 a6 b6 b6 c6 c6 d6 c6 d6 (Frank 483:1). Sei coblas unissonans di dodici versi.

Note: Tenzone composta all’inizio del tredicesimo secolo, i cui interlocutori sono il trovatore Gui de Cavaillon, protetto di Alfonso II conte di Provenza, e il giullare Falco, forse lo stesso che tenzona con Faure (BdT 149.1), e da identificare con Folco Bertran d’Avignon secondo Oscar Schultz-Gora, «Zu den Lebensverhältinissen einiger Trobadors», Zeitschrift für romanische Philologie,  9, 1885, pp. 116-135, a p. 124; cfr. poi Saverio Guida, «Per la biografia di Gui de Cavaillon e di Bertran Folco d’Avignon», Cultura neolatina, 32, 1972, pp. 189-210, a p. 209. – Al v. 68, l’accento della parola in rima comte è spostato sulla seconda sillaba.

[fc, os]


BdT    Gui de Cavaillon    Falco