Lanfranc Cigala (282.13)

		Lanfranc Cigala
		Lantelm, qui·us onra ni·us acuoill
		a pauc de scienza,
		q’en vos no trob’om mais orgoill
4		ab desconoissenza;
		e comtatz de Gui de Nantoill
		en loc de Valenza
		ez enpastatz coblas ab soill
8		de descovinenza.
		Mas entre nos cern om be joill
		de bona semenza,
		per qe la meton ssai en moill,
12		qan es de durenza.
		Mas fort faillon Breissan, part Oill,
		de qe·m desagenza,
		qar ill prendon vostre jangloill
16		per chan de Proenza,
		per q’eu lor do
		per cosseil bo
		c’a ioglar nec
20		bavec
		e pec
		e cec
		non donon tan de grec
24		car es grans faillenza.
		E ges no taing
		dir aur d’estaing
		ni taing donar,
28		ni far
		cuidar
		ioglar
		uei qe lo tegnon car,
32		car es [breu] tenenza.

		Lantelm, eu·s am, per q’eu no voill
		qe foudatz vos venza,
		q’anatz ab bonas gens en broill
36		si chans lor agenza;
		qar del vostre chan fan vostr’oill
		ploran penedenza,
		e·l chans-plors fai lo plus vert foill
40		secar en parvenza,
		e parlatz tan c’ab vostra groill
		faitz fugir plasenza,
		qar vos laisset Qes de Cardoill,
44		l’enoi per tenenza.
		Mas, car del vostre dan mi doill,
		vos lau q’estenenza
		n’aiatz, estiers m’amor vos toill
48		e ma benvolenza,
		qar en perdo
		pren ioglars do
		qe chan renec
52		e prec;
		e·l dec
		del bec
		aia d’Artimalec
56		e·n si descrezenza.
		De Carlemaing
		o de Galvaing
		no saps comtar,
60		siblar
		sautar
		danzar,
		mas vos sabetz desfar
64		tota convinenza.