Lanfranc Cigala (282.2)

		Lanfranc Cigala
		En chantar d’aquest segle fals
		ai tant’obra perduda,
		dont tem aver penas mortals,
		si merces no m’aiuda.
5		Per que mos chans si muda,
		e·l vueill ofrir
		lai don venir
		mi pot complid’aiuda;
		sol no·m si’irascuda
10		la Maire Dieu,
		cui mos chantars saluda.

		Pero, si garda mos peccatz,
		ben deu esser irada;
		mas sa grant merce prec, si·l platz,
15		la mi fass’apagada.
		Aitals merces m’agrada,
		quar es secors
		dels peccadors,
		cui es razos loniada.
20		Sia·m merces donada,
		Maire de Dieu,
		quar per merce fust nada.

		Qu’anz que·l vostre bels cors ioios
		nasques, era establida
25		morz a chascun qu’el segle fos,
		quar l’avia merida
		Eva, tant fon ardida,
		quar tenc a leu
		lo dig de Dieu:
30		de que fon pois aunida.
		Mais pois en vostra guida,
		Maire de Dieu,
		em trag de mort a vida.

		Per Eva e per son peccat
35		era tota genz morta;
		mas per vostra vergenitat
		n’es uberta la porta.
		Eva per via torta
		nos aduis mort,
40		e vos conort,
		don la gens es estorta.
		Tal frug vostr’albres porta,
		Maire de Dieu,
		que vida nos aporta.

45		Ev’autreiet, quar li fon bel,
		al diable bauzia,
		e vos a l’angel Gabriel
		la vera profecia.
		Eva ac nom l’enemia;
50		el contradig,
		segon l’escrig,
		ditz hom: «ave» Maria.
		Tot so qu’Eva desvia,
		Maire de Dieu,
55		«ave» torn’en la via.

		Per qu’eu vos lau e·us dei lauzar
		gloriosa Reina,
		que chascunz nafratz pot trobar
		en vos vera mezina,
60		quar vostra merces fina
		chascun que·s vol
		garis de dol,
		de mal e de ruina,
		si de cor vos aclina,
65		Maire de Dieu,
		qu’als bos precs es vezina.

		Ara vos prec e·us clam merce
		que no·m siatz loindana,
		qu’ieu sent nafrat mon cor e me
70		e ma voluntat vana
		de folli’e d’uffana,
		per qu’eu vos quier
		conseill entier
		et aiuda certana.
75		Sia·m merces prosmana,
		Maire de Dieu,
		don m’arma sia sana.

		Quar si tot ai d’obra faillit,
		crezens’ai dreit’asiza:
80		Paire, Fil e Saint Esperit
		crei un Dieu, ses diviza;
		la charn, qu’en crotz fon miza,
		pres Dieus de vos
		per salvar nos,
85		e per so fon auciza;
		e qi cre d’autra guiza,
		Maire de Dieu,
		sai ben qe·l col se briza.

		E crei que fos enant lo part
90		et apres ses faillenssa
		vergena, ques anc no i ac part
		hom ni carnals semensa:
		e·l ver salm que comensa
		«Credo» crei tot
95		de mot en mot;
		d’alre·m faitz doncs valensa,
		quar de falsa crezensa,
		Maire de Dieu,
		no m’a obs penedenssa.

100		Pero, Domna, quar miels sabes
		so que·m fai sofraichura,
		de so qu’obs m’es mi secorrez
		tant quant vida mi dura,
		qu’eu faz’obra tant pura,
105		que paradis
		aia conquis
		cant er la noiz escura.
		Be sai que·m noz drechura,
		Maire de Deu,
110		mais merces m’asegura.