Peire d’Alvernhe (323.24)

		Peire d’Alvernhe
		Sobre·l vieill trobar e·l novel
		vueill mostrar mon sen als sabens,
		qu’entendon be cil que a venir son
		c’anc tro per me no fo faitz vers entiers,
5		e qui non cre qu’ie·n sia verdadiers
		auia dese con estau a razon.

		Qu’ie·m tenc l’us e·l pan e·l coutel
		de que·m plas apanar las gens,
		que d’est mestier s’an levat capairon,
10		ses acordier, que non rompa·l semdiers:
		qu’ieu dic que ner si mostron faitz non vers
		e a fol parler ten hom lui al sermon.

		C’az un tenen ses mot borrel
		deu de dir esser avinens;
15		quar qui trasaill de Maurin en Miron
		entre·l mieg faill, si no·s pren als ladrers:
		comde·l trebaill qu’eis motz fai trezagiers,
		qu’en devinaill met l’auzir de mai son.

		E qui qu’en frima ni·n fragel,
20		pos qu’es mos trobars tan valens,
		. . . . . . . . . . . . . . . . . . .
		qu’ieu soi raitz e dic que soi premiers,
		de digz complitz vensen mos fatz guerrers,
		que·m levon critz que ieu no m’en tenh pron.

25		Donx com qu’ill sion d’un tropel,
		menton tot gentet per las dens,
		qu’ie·m sen sertas del mieils que aqui fon
		e seguras de mon chant e sobriers
		ves los bauzas, e sai que dic, estiers
30		no vengra·l gras don a trop en sazon.

		Quar er m’abelis e m’es bel
		qu’el mieu ioi s’enant lo iovens,
		e si er enic que lur an environ,
		aisi m’en gic c’uns gaugz mi creis dobliers
35		d’un dous espic qu’es ioios consiriers,
		don m’an amic hueimais li mal e·ill bon.

		D’aisi·m sent ric per bona sospeison,
		qu’en joi m’asic e m’estau volentiers
		ab joi pic e gaug mos deziriers
40		† et ab joi pic e gaug † vueill Dieus lo·m don.