Peire d’Alvernhe

Al dessebrar del pays

on m’avi’amors conquis,

aprendetz, si no·us es fays,

so don m’alegr’e m’irays

on que·m vir;

mas tan cum suy ab gent conia

no·m dey per ira marrir,

qu’on mays puesc ades non ponia.

Mas ves un’amor fuy fis

tro qu’a lieys plac que·m giquis,

e quar al sieu tort mi trays,

ben fazen et  . . . . . [ays]

ab ben dir,

qu’ar de doussa terra conia

mi tray e·m fai dessalhir;

mas, quan que tric, l’er vergonia.

Anc non aniey tans camis

ves Francs ni ves Sarrazis

on mielhs fos demandatz iays,

ni plus amatz pretz verays

ab servir

e·l gens qu’es cortez’e conia,

sill que·m veiran tart venir:

ta mal m’es qui m’en deslonia!

Si l’amor don fuy vezis,

dont ara m’esfredezis,

amer’ieu plus que Roays:

e si no·m fos per fols brays

trassalhir,

et a la mia doussa conia

si m’escaes a mentir, 

vos agratz d’aital messonia!

Des er hueymais m’esbaudis

pus amars m’enamarzis,

qu’ara·m sent de totz assays

vertz e blancs e brus e bays;

e m’albir

e dic vos d’amor nems conia

que paors es de perir

lai on no l’es ops que lonja.

Ar an ses cor e·ls fals ris

tot aisi cum l’abelhis,

qu’ieu mi grup de lieys e·m lays

e mi no veira ia mais.

A partir

m’ave de la terra conja:

si no·m fos per que·s n’azir,

mes mi fora en canonja.

Senher n’Estrieu, qui s’aconia

de trop human ioy iauzir

mal fa qui non lo calonja.