Peire Bremon Ricas Novas

Rics pres, ferms e sobeirans,

domna, vos ten sobeirana,

e sai q’es del miel certana,

dont ieu vos sui homs certans.

5

E per los oils de ma cara,         

bella dompna plazenz, cara,

anc no·us ai voluntat vana,

ni·us fui un jorn flacs ni vans:

pero mais non viurai sans

10

si vostre gentz cors no·m sana.

E si vostre bels cors plans

lo mal q’eu ai no m’aplana,

ni vos n’estatz segurana,

de la mort sui segurans,

15

car lo mals d’amor m’afara

lo cors e·l cor, si que ara

mal, q’Amors lo m’amana,

qar mi loing de vostras mans;

e si ja·us estauc loindans,

20

jes m’amors no·us er loindana.

Rics fora, s’istes propdans

de vos ni·m fosses propdana,

qar hanc nulla crestiana

non amet tant crestians

25

com am vos, qe·m faitz avara

autr’amor tant qe no·s vara

mos cors de vos, on Pres grana:

qar vos es de valor grans,

e non par siatz de grans,

30

qi·us ai’ab color de grana.

Mais n’amera Catalans,

si vos fosses catalana,

pero, car es castelana,

volgr’ieu esser castellans,

35

qe·l cossir mi tol e·m gara

vostre gentz cors, qant m’esgara;

e car mi semblatz serrana

sui sers dels vostres Serrans;

e servirai Surians,

40

si vos fossetz suriana.  

Ja nuls lauzengiers trafans,

ni gelos, ni gens trafana,

ni hom qui ab ditz vilans

fai sa lengua trop vilana,

45

non tolran qe ieu ancara 

non mir vostra faizon clara

per lur garda soteirana;

ni, per gardar, soteirans

no·i s’es mes gaire mejans,

50

mas d’Amor, qi es mejana.

Domna, douzamenz m’agrana

ab finz jois chascuns dels grans

qe·m detz, e se ja viu sans,

aiso·m tol la mort e·m sana.

55

N’Audeiart dels Baus, certana  

valors e fins pres certans

fan vostres faigz sobeirans,

e vos de Pretz sobeirana.