Peire Bremon Ricas Novas

Ben deu istar ses gran joi totztemps mais

cell qi no·s pot partir de son seinhor,

qan per servir non pot aver s’amor

ni no ha cor qe del servir se lais.

5

Piez trai de priço 

e plus greu martire 

qan ses gizardo

serv e qe s’albire

qe bes ni graz no·l n’eschaia:

10

be m’es semblan qe maltraia! 

E totz seinhers deu estar en pantais

qan sap qe·l sieu han gaug, s’el pren honor,

si no los creis e non lur ten amor,

pos lo servon de bon cor ses biais.

15

Qar seinhor fello   

taing qe Dieus l’azire

qant ha, ses razo,

cor dels sieus aucire;

ez er greu qe non deschaia

20

qi·ls sieus destrui ni·ls esmaia.   

Tot aisso dic con fins amics verais

per ma donna e non fas ges clamor,

q’ab tal plazer sai dezirar s’amor

qe jauzentz sui d’aisso q’autres s’irais.

25

Q’a mi saupra bo  

s’ill mi deinhes dire,

per merce, de no

del joi q’ieu dezire,

qar ja non er q’a leis plaia

30

q’ieu mon dezir li retraia. 

Anc ren no·m det ni·m promes ni m’estrais,

ni eu no·l qis; anz mi fai tal paor

q’ieu no·il aus dir con li tenc fin’amor,

ni ja null temps no m’ensira del cais

35

s’ill no me·n semo;   

ni ai cor qe·m vire

per dan ni per pro,

ni per nuill cossire:

q’ab un dous desir m’apaia

40

qar aus dezirar q’il m’aia.   

En ma donna non tainh ni mens ni mais,

e pares be a sa vera valor

qez ill tem Dieu e Dieus li ten amor

qar anc non fes re mas aqo qe tais;

45

per q’en luec de do 

jauzisc qan remire

sa plaisen faisso,

si tot me·n suspire;

q’ieu non vueilh re qe·l sostraia

50

sa vera valor veraia.

Tan m’es bell e bo

qan ieu li remire

la boca e·l mento,

qe d’un dous dezire

55

viu joios, si tout m’esmaia,

q’el plasentz vesers m’apaia.

Nulls lausengiers non m’esmaia,

antz prec Dieu toutz los deschaia.