Peire Bremon Ricas Novas

Be volgra de totz chantadors

fos tan sobriers majers mos sens,

car am mielhs e sui pus temens

de totz los autres amadors:

5

breu fera pus adomniva

chanso, onran e tenen car

vos, que m’es de ric pretz ses par,

dona plazen senhoriva; 

que far la degra mielhs de be,

10

car aten tan auta merce.

E qui per dir sobrelauzors

de sa dona fon anc mentens,

don las vos et er ver dizens,

dona, car vostra grans valors

15

es tan per drech sobrautiva,

c’ab lieis no·s pot lauzors engar;

per que deu tot laus averar

vostra valors esforsiva,

c’ab sel creis l’autz pretz que·us mante.

20

Per qu’ieu dezir de vos merce.

Aisso·m fai dir, dona, Amors,

e l’onratz pretz sobrevalens

que·us fai grazir a totas gens,

per que una dossa legors

25

es de mon ferm cor aiziva 

totas vetz que n’auja parlar.

C’usquecx vos cuja mielhs lauzar,

car vostre laus vers aviva

lurs lauzors, car aisi·s cove.

30

Per so no·us aus clamar merce.

Tant es nobla vostra ricors,

e·l vostre nous cors convinens

es tan bels, e l’esgartz plazens,

e tan vera·l fina colors

35

fresca, natural e viva;

e tant gent sabetz dir e far

so que·us tanh et azaut onrar

c’a tot hom es agradiva;

per qu’ieu non ai fin joi de re

40

mais d’atendre vostra merce.

Mot es rics pretz, sens et honors,

mezura e ensenhamens

ab vos, dona, e sui jauzens

can dezir lo vostre secors,

45

que mos ferms volers m’abriva, 

mas ab tot so tem dezirar:

doncx be·us temeria prejar.

«Com?» Car Amors m’o esquiva,

tant que ja no·us dirai, so cre:

50

«Belha dona, si·us plai, merce!»

S’ieu vos auzes prejar de re,

dona, be·us queregra merce.