Peire Milo

Pois qe dal cor m’aven farai chanzos,

e pois q’eu vei ’spandre flor de novel

e pois q’eu vei alegrar li auzel

4

qi van chantan sus l’arbre el follios,

e pois q’eu vei l’un de l’autre iauzir,

ben puesc aver pensament e consir

car anc un iorn no fui ioios d’amar,

8

ni ia per mal d’amor no·m posc estrar.

Domna, en vos trobei tals guierdos

com fa al lop lo chabrol e l’agnel

qant enver lui ill corren senz revel

12

e laissan star las fedas e·ls moutos:

aissi, domna, al prim al mieu albir

per la meillor eu vos cudai chauzir;

mas iogador ai vist soven iogar

16

qe get’a fal ez envi’a entrar.

Hai, ma dona, ·l vostre cors orgoillos

tolla d’aissi e l’ira e·l capdel

e fassa mi, si·us plaz, un semblan bel,

20

e ia poissas non serai ataïnos.

Meravill me, car am tant e dezir,

qe per merces no vol un prec auzir:

ia aug merces lo segner Deus d’un lar

24

qi en la crois li saup merces clamar.

Las, qe farai? Morrai tan cossiros?

Oc, q’eu non puesc de leis aver apel,

e com li soi cascun iorn plus fizel

28

eu mais la trop vas mi plus aïros’

e cant la veg encontra mi venir,

eu vag vas leis tan ioios per servir,

donc se capten escura del iogar:

32

mas ia vi far apres scur temps ben clar.

Ara soi eu en carcer, tenebros:

sa par no vi en mur ni en castel,

qe eu non puesc trobar clau ni martel

36

qi·m puesca trar de las mans de leos;

e pois merces, q’era clau de l’aubrir,

eu non lai trop, soi vencutz, sens mentir;

ni ia per zo no·m recrerai d’amar,

40

q’ieu vi ia hom q’era vencutz sobrar.

Ai, mala res, Dieus vos lais repentir

del mal qe·m faitz, don m’aves fait florir:

c’aissi com pert tot’aiga douz’e mar

44

son nom, si·l pert en vos Amors, so·m par.