Pons de Capdoill

I.

So c’om plus vol e plus es voluntos

e so c’om plus desira ni ten car

devem chascus relinquir e laissar,

car ben vezem que luocs es e sazos

que cel Seignor q’es leials perdonaire,

reis de merce dreituriers e salvaire,

anem servir, q’el nos fetz veramen,

e receup mort per nostre salvamen.

II.

Aras podem saber q’El fetz per nos:

qu’El se laisset d’espinas coronar,

batre e ferir e de fel abeurar,

e·ns rezemet del sieu sanc precios.

Ailas, chaitiu! Tant mal fant lor afaire

cill que no·i van, e cuidon sai sostraire

a lor vezis las terras falsamen.

Paor deuran aver al jutgamen!

III.

Qui remanra non es savis ni pros,

car no·is pot l’us ben en l’autre fiar,

per qe ditz hom qe plus non pot durar

segles. Adoncs remanran vergoignos

li ric baron si·l segles dura gaire;

ben son torbat lo reis e l’emperaire

si remanon gerreiar per argen

ni per terra, sitot lor faill breumen.

IV.

Qui qui remaigna, ieu irai voluntos,

q’ieu sai non puosc los bes guizerdonar

que Dieus m’a faitz, ni los tortz esmendar;

per q’ieu li prec car El es piatos,

e·il clam merce aissi cum fetz lo laire.

E vailla nos la soa doussa Maire,

e sains Johans nos vailla eissamen,

que nos venssam aqesta falsa gen.

V.

Cui que sabon las leis e las leissos

e·ls bes e·ls mals no·i volon jes anar;

q’ie·n sai de tals c’amon deseretar

mais crestians que sarrazis fellos;

e si·n parlatz diran vos q’etz pechaire;

e cill qe·is fant dels autres predicaire

deurion si predicar eissamen,

mas cobeitatz tol a clercia·l sen.

VI.

Reis d’Aragon, francs, humils, de bon aire,

vos servetz Dieu de bon cor humilmen;

El sia ab vos, e tuich digam ‘Amen’.