I.

1. Aissi mou    un sonet nou
2. on ferm e latz
3. chanson leu,    pos vers plus greu
4. fan sorz dels fatz:
5. qu’er er vist,    pos tan m’es quist,
6. cum sui senatz;
7. si cum sol fora    mos cors vezatz,
8. mas camjar l’ai pos quecs o vol.

II.

9. Tot m’es nou    quan vei, si·m mou
10. fin’amistatz;
11. far puosc greu,    vas que dic leu,
12. mas voluntatz.
13. Tant ai quist    que ai ben vist
14. cum poja gratz;
15. qu’al mo vol    for’eu aut pojatz:
16. anquer es mos gratz lai on sol.

III.

17. Tant ai prim    mon cor quan rim,
18. que·ls adiratz
19. tem de loing,    mas de pres poing
20. cum fos amatz
21. per cel joi    don fals ni croi
22. non an solatz;
23. trop derenc    car dic qu’il m’am, qu’assatz
24. fai si·m sofre qu’eu l’am sovenc.

IV.

25. Amors, rim    co·s voilla prim,
26. pos m’es de latz
27. en que poing,    qu’ab colp de loing
28. son pres nafratz;
29. tot m’es croi    quan d’autre joi
30. sol me tocatz:
31. si no·us venc,    Amors, mala fui natz!
32. que posc’amar e mens ric renc!

V.

33. Ges un ou    non pretz quan plou,
34. si·m sui moillatz,
35. freg ni neu,    tant ai pes breu
36. del joi que·m platz;
37. mas per Crist,    pos mi fai trist
38. quan pes iratz,
39. cor ai fol    car am sols ses solatz:
40. aissi torn mon bon pes en dol.

VI.

41. Era·m plou,    que·m fai un ou
42. trucan los datz,
43. e si·n breu    vei cazer neu,
44. anz es estatz;
45. tant ai trist    mon cor per Crist,
46. totz sui camjatz:
47. qu’er ai dol    et er ai gaug viatz,
48. ve·us m’en savi e ve·us m’en fol.

VII.

49. Quant nos vim,    sempr’es al cim
50. mos cors ausatz,
51. pois d’als soing    non ac ni·s joing
52. vas autre latz,
53. per que coi    qu’alres m’enoi:
54. trop l’am! non fatz!
55. lai la tenc    eu quant al cor platz,
56. qu’anc pos la vic d’als no·m sovenc.

VIII.

57. Sus d’aut cim    fui, quant nos vim,
58. jos davalatz;
59. si no·s joing    so dont ai soing
60. mal sui liatz!
61. qu’il m’enoi,    Amors, per coi:
62. d’ela pensatz;
63. no·us sovenc    anc de lai, mas mi datz
64. la mort, car vezetz que no·m tenc.

IX.

65. Trop mi tenc,    que lai non sui anatz
66. saber d’amor s’anc l’en sovenc.

X.

67. No·m sovenc   anc de lai, so sapchatz,
68. mas una vetz que·m vi e·m tenc.