Raimbaut d'Aurenga (389.37)

		Raimbaut d’Aurenga
		Pos trobars plans es volguz tan,
		fort m’er greu si non son sobrans,
		car ben pareis qi tal[s] mot[z] fai
4		c’anc mais non foron dig cantan,
		qe cels c’om tot jorn ditz e brai
		sapcha, si·s vol, autra vez dir.

		Mos ditz es sans don gap ses dan:
8		per tal joi soi coindes e vans
		qe mais val neis desirs q’ieu n’ai
		d’una qe anc no m’ac semblan,
		pels sainz c’om qer en Verzelai!
12		d’autre joi c’om puesca jauzir.

		Son ben aurans, car per talan
		solamen so francs e humans
		de dir ves leis ben ni·m fas gai;
16		qe·m val si per lieis trac mal gran,
		si lo mal q’en trac no sap lai?
		mi eis voil d’aitan escarnir?

		Ben so trafans q’eu eis m’engan,
20		car dic aiso tan qe vilans:
		cals pros me creis si eu mal trai
		per leis, s’il no sapia l’afan?
		no m’es doncs pros e be no·m vai
24		si·m pens qe tan ric joi desir?

		Mos volers cans qe·m sal denan,
		me fai creire qe fu[s]tz es pans;
		tan aut m’espeis mon cor car sai
28		q’en fol m’aurei, don faz l’efan:
		tot voll cant vei; Respeit segrai:
		Respeitz loncs fai omen perir.

		Sains Julians, con vauc torban!
32		soi serrazis o crestians?
		qals es ma leis? non sai! qe jai
		me posca de so q[e·]il deman
		e atrestan tost dieus, si·l plai,
36		co fes vin d’aiga esdevenir.

		Pauc soi certans: ves qe·us reblan,
		domna! de vos so molt lo[i]ndans!
		anc no·m destreis amors tan mai,
40		per q’ieu non creiria d’un an
		c’aissi·us ames per negun plai,
		si bes no m’en degues venir.

		Astrius e ma chanso vos man;
44		qe dos sautz si rics ar essai:
		lo ters aut on plus pot om dir.