Donna, cel qe·us es bos amics,

a cui vos es mals et enics,

vos clama merce d’una re:

c’auiaz cho qe·us vol dir per be

aici en esta carta escrit,

ez escoutaz com o a dit.

E prega·us qe non respondaz

tro qe tot auzit o aiaz,

qe tal ren i aura ben leu

al fenir qe ja no·s er greu.

«Domna granz pena trauc per vos,

anc mais non saubi mal qe·s fos.

Eu ai amat ben autra vez

ves altra part on era frez

leialmen e senes enian,

mas anc mais no trais tan d’afan.

Anc mais null’amors no·m toqe‹t›

lai on la vostra ira m’intret,

ni no m’isit de tan preon

com aqesta, e no sai don.

Anc mais no sap qe·s fos amors

ni no senti de sas dolors;

c’amors m’a mes e[n] tal destreich

q’en granz chalors mi dona freich

et ab granz freich mi dona chaut,

e·m fai irat s’anc mi fez baut.

Dos enemics ai trop mortals:

vos et Amors, don qe<c>s m’es mals.

Mas vos m’es enemics de cor,

qi·m tolles ris, jois e dimor,

e·m mostraz vostre mau talen,

e dizez me tot a presen.

Mas Amor no auch ni no vei,

ni no sai ves qal part s’estei;

per q’eu non puos contendre a lui

mas greu m’es car de mi no·s fui.

C’amar vos mi fai de tal guisa

on <n>ostra amor es mal devisa:

q’e·us am e vos no amaz mi;

fort mal joc partit a aici.

Amors se demostra vilana

qi vos fai estar bauda e sana

e ve qe nafrat m’a tan fort

q’eu cuith aver trop peich de mort.

Car si sol a mort n’estorzia

ja tan fort no m’en plagneria,

car qi tot tems vio a dolor

peiz a de mort, qi no·l secor.

S’Amors fos tan ben enseignada

<q>e d’un pauc vos agues nafrada

– sol neis de la milena part

qe mi nafret en un esgart –,

ab aitan m’agra gen garit

d’aqel mal colp qe m’a ferit.

Ges la plaga non par de fora

mas dinz lo cor m’art et acora,

e no m’en pot valer mezina

ses vos: ja tan no sera fina.

E s’eu per aicho rec[e]up mort

vos ez Amors n’aurez lo tort

qe·m pograz sanar e garir:

ja no·us en calgra Amor blandir?

Domna, non puosc ab toz contendre:

vos pregar et Amor defendre,

q’eu no vos pos ges far amar

s’Amor no m’en vol aiudar.

Pos vei qe mos precs no m’i val,

laserai m’en; [si] pogues al!

Mas Amor no·m laissa garir

qi m’a mes en aqest conssir,

qe d’autra part non aug ni veich

mas vas la terra e vas l’endreich

on mais vos vei; mais n’ai de dol

per lo grant gauch qe far mi sol.

Soven pens qe ja mais no·us veia

e qe de loing ses vos m’esteia,

qe qant eu vos vi de premier

vos me disez ben a sobrier,

ez on plus annei a enan

e vos m’o annez peiuran;

per q’eu tem, s’eu mais vos vezia,

qez ades m’en peiuraria

c’atresait me feiraz aucir.

Ez eu enqer no voil morir

qar sol pel bon respeith voil viure.

Non sai s’e<n> fol mos dich vos liure,

mas se vos me tenez per fol

d’aqo qe·us dic, enclin lo col:

to<t> qan vos plaz m’es bon e bel,

ja no·us farei autre revel.

Greu m’es qan mal no·us pos voler

c’Amors no m’en dona poder;

qe s’eu vos pogues voler mal

nos fora alqes comunal

d’aitan, se no·m volcses amar,

qe·m pogra en altra part virar.

Mas d’aiqo sol non i a re

car eu non ai poder de me;

d’aicho·m podez ben far orguoill:

er agradaz s’e·us am e·us voill!

Qe s’eu sabia tot en ver

qe ja pro no·m volses tener,

ni e<n> trastota vostra vida

vostra amistaz no<·m> fos cobida,

autra non poria amar ges

per nulla beltaz qez agues.

Si no·m volez estre amia,

aizo no·m pode<z> tolre mia:

q’eu toz temps no·us sia amics

sitot m’es vostre cor enics.

Domna, car en mos dich no·us lau

ni vostra beltat no mentau

e<u> o faz be<n> a escien,

q’en re mais no cuit aver sen

c’a mon grat vos cuiariaz

qe ja ta<n> bella no fussaz.

Car per la beltaz qez avez

sai be qe plus vil me tenez.

Domna, maldit sion miraill

e belleza car no vos faill!

Domna, ja miraill no crezaz:

cuiaz qe tan bella siaz

com inz el miraill vos vezez?

Ben es folla si o crezez,

qe tot mirail son menzo[n]ger

e foson fraich toz li enter!

Domna, ceus qi·os lauzan en re

saphaz qe non o fan per be,

c’aitan vos volon escharnir

can vos lauzan ab lor mentir.

Mas eu no·us serai ja mentire,

domna, c’ades vos voil ver dire.

Mi·n crezaz, domna, qe·us dic ver

– ja negus no n’aia poder –

car eu no vos lau ges per bella,

anz dic q’es negra com niella.

Domna, vas totas parz predic

qe plus es laida q’eu non dic;

mas a mi fora<z> asaz genta

c’aitals laida res m’atalenta.

Domna, si eu volia dir

tot aiqo q’eu de vos cossir

no·<u>s o [a]uria dich d’un an,

mas eu tem no·m tornes a dan.

Per q’eu no·us en voil far lonc plait

e dic vos be tot atresait:

domna, se·l vostr’om pert en re

sapchaz qe vos i perde<z> be.

Ben sabez qe vostre sui eu

ni non ai mais segnor soz Deu;

per cho sapchaz be tot de cert

qe vos i perdez s’eu i pert.

Domna, del pauc tort q’eu vos ai

ja sol no m’en razonarai,

e si n’auria asaz razos

vos trobarez mas ochaisos.

Per jase mi podez durar,

toz temps m’o podez contrastar,

domna, car entre mi e vos

no voill plaides, mais sol nos dos,

qe ja nos parta d’est conten,

qe res mais non sap mon talen.

Ja non plaideiare[i] per leich:

per vos metessa<·n> prendez dreich;

ez e<u> i cuit ben dir tal re

o non podez trobar mes be.

A Merce non podez ren dir

c’ab aqo <v>os dei convertir:

lai o neguna res non val

Merces de<u> amortar lo mal.

Merces n’aiaz e chausimen:

no vos i traich autre guiren.

Domna, merce vos qer, si·os plai,

en mais guisas q’eu dir no sai.

Aici·us qer merce e perdon

com Deus perdonet al lairon.

Domna, s’eu rece<u>p mort per vos

ja no vos sera negus pros.

Morai? o eu: com hom mespres

qe de meiz morç estai en pes.

Sospir mi fan fenir mon comde,

ves vos mi lais vencut e do[m]de;

plor mi tol q’eu non puos plus dire,

mas cho q’eu volgra dir conssire.

Domna, merce vos qer, si·os plaz,

per merce qe merce n’aiaz.

Merce vos clam, ma dolz’amia,

anz qe la morz aissi m’aucia».