Ricaut Bonomel (Templier)

I.

Ir’e dolors s’es e mon cor assiza,

si c’ab un pauc no m’ausi demanes,

o meta jus la cros c’avia preza,

a la honor d’aqel q’en cros fo mes;

car crotz ni lei no·m val ni guia

contrals fels turcx cui Dieu maldia;

anz es semblan, en so c’om pot vezer,

c’al dan de nos los vol Deus mantener.

II.

Al primier saut an Cesaria conqiza

e·l fort castel d’Alsuf per forza pres.

Ai, segner Dieu, a cal via an preza

tan cavaliers, tan sirven, tan borzes

con dinz los murs d’Alsuf avia!

Ailas! lo regne de Suria

a tant perdut qe, qi·n vol dir lo ver,

per tostemps mais n’er mermatz de poder.

III.

Doncs ben es fols qi a Turcs mou conteza,

pois Jhesu Crist non los contrasta res,

q’il an vencut e venzon, de qe·m peza,

Francs e Tartres, Erminis e Perses,

e nos venzon sai chascun dia,

car Dieus dorm qe veillar solia,

e Bafometz obra de son poder

e·n fai obrar lo Melicadefer.

IV.

No m’es semblan qe per tan se recreza,

anz a jurat e dit tot a pales

qe ja nuls hom que en Jhesucrist creza

non remandra, s’el pot, en sest paes;

enan fara bafomaria

del mostier de Sancta Maria,

e·l sieus car fis, q’en degra dol aver,

o vol e·il plaz: ben deu a nos plazer.

V.

Lo papa fai perdon de gran largeza

contr’als Lombartz, a Carl’e als Frances,

e sai ves nos en mostra grant cobeza,

qe nostras crotz perdona per tornes;

e qi vol camjar romavia

per largeza de Lombardia,

nostre legat lor en dara poder,

q’il vendon Deu e·l perdon per aver.

VI.

Segnor frances, Alixandria

nos a piegz fait qe Lumbardia

qe sai nos an Turcs sobrat de poder,

pres e vencuz e donatz per aver.