Uc de Saint Circ

I.

Un sierventes vuelh far en aquest so d’En Gui,

que farai a Ffaienza mandar a·N Guillami,

et al comte Gui Guerra e·N Miquel Morezi,

et a·N Bernat de Fosc et a Sier Ugoli,

et als autres que son laïns de lor fe fi;

e sapchan, cum qu’a lor de laïntre esti,

que·l sos e·l noms e·l pretz e·l laus qu’om de lor di

los corona d’onor, sol fassan bona fi.

II.

Bona fin deu ben far e Dieu li deu far be

qui franquez’e dreitura e la Gleyza mante

contra selh qe non a en Dieu ni en leis fe,

ni vida apres mort ni paradis non cre,

e dis c’om es niens de pueys que pert l’ale;

e crueltatz l’a tolta pietat e merce,

ni tem layda falhida fayre de nulha re,

e totz bos faytz desonra e bays’e descapte.

III.

Si·l chaptel coms Raimons gart qe·n fassa son pro,

qu’ieu vi que·l papa.l tolc Argens’ et Avinho

e Nemz’e Carpentras, Vennasqu’e Cavalho,

Uzetge e Melguer, Rodes e Boazo,

Tolzan et Agenes e Caortz e Guordo;

e·n mori sos coynhatz lo bons reys d’Araguo;

e s’el torn’a la preza per aital ochaizo,

encar l’er a portar el man l’autruy falco.

IV.

Lo falcos filh de l’aigla quez es reys dels Frances

sapcha que Fredericx a promes als Engles

qu’el lor rendra Bretanha, Anjou e Toarces,

e Peitau e Sayntonge, Lemog’ez Engolmes,

Toroinn’e Normandia e Guian’e·l paes,

e venjara Tolzan, Bezers e Carcasses;

doncs bezonha que Fransa mantenha Milanes

e·N Albaric que tolc qe lai passatz non es.

V.

Passatz lai fora ben s’ilh n’agues lo poder,

que de ren als non a dezirier ni voler

mas cum Frans’e la Gleiza el pogues decazer,

e la soa crezensa e sa ley far tener;

don la Glieza e·l reis hi devon pervezer

qe·ns mandon la crozada e·ns venhan mantener;

et anem lai en Polla lo regne conquerer,

quar selh qu’en Dieu non cre non deu terra tener.

VI.

Ges Flandres ni Savoya no·l devon mantener,

tant lor deu del elieg de Valensa doler.