Vidas del ms. B

 

 

 

 

Gaucelm Faidit

 

1 Gaucelms Faiditz si fo d’un borc que a nom Userta, que es el evescat de Lemozin, e fo fills d’un borzes. 2 E chantava preitz d’omen del mon; e fetz mout bons sos e bons motz. 3 E fetz se ioglars per ochaion que el perdet a ioc tot son aver. 4 Hom fo que ac molt gran larguesa; e fo mout glotz de maniar e de beure, e per so el venc gros outra mesura. 5 Mout fo lonc temps desastrucs de dons e d’onor a prendre que plus de .XX. anz anet a pe per lo mon, qez el ni sas chansos non eron volgudas ni grazidas.      6 E pres per moiller una soudadieira q’el menet ab se lonc temps per cortz, que avia nom Guillelma Monia. 7 Fort fo bella et ben enseignada, e venc si grossa cum era el.    8 Ella fo d’un borc qui a nom Elest, q’es de la marcha de Proenssa, q’es de la seignoria d’En Bernart d’Andusa. 9 E messier lo marques Bonifacis de Monferrat lo mes en aver et en raubas et en arnes et en gran pretz lui e sas chanssons.

 

 

 

Testo: Ornella Damiano, Rialto 15.iv.2005.


Ms.: B 47v.

[OD]

Vidas di B    Vidas