Vidas del ms. B

Lo Monge de Montaudon

1 Lo Monges de Montaudon si fo d’Alvernge, d’un castel qe a nom Vic, q’es pres d’Orllac. 2 Gentils hom fo e fo faitz monges da l’abadia d’Orllac. 3 E l’abas li done lo priorat de Montaudon, e lai el se portet ben del ben de la maison. 4 E fazia coblas estan en la mongia e sirventes de las razons que corrion en aqella encontrada. 5 E·il cavallier eil baron lo traisseron de la mongia, e feiront li grand honor, e deront li tot so qe·il plac e q’el volc ni·l lor demandet; et el portava tot a Montaudon al sieu priorat.    6 Mout crec e meilloret la soa gleisa, portan totas vez los draps mongils. 7 E tornet s’en ad Orllac, al sieu abat, mostran lo meilluramen q’el avia faich al priorat de Montaudon; e preiet li qez el li dones gratia qe·is degues regir al sen et a la voluntat del rei Amfos d’Aragon; e l’abas la·ill donet. 8 E·l reis li comandet carn e dompneies e cantes e trobes; et el si fetz. 9 Et el fo faitz seigner de la cort del Poi Sainta Maria e de dar l’esparvier. 10 Lonc temps ac la seignoria de la cort entro que la cortz se perdet.   11 E pois el se partic d’aqui et anet s’en en Espaigna, e fo li faitz grans honors e grans aplazers per totz los reis e per totz los barons e·ls valens homes d’Espaigna. 12 Et a un priorat en Espaigna, que a nom Vilafranca, q’es de l’abadia d’Orllac. 13 E l’abas la·ill donet. 14 Et el lo crec e l’enriqui e·l meilluret; e lai moric e fenic.

Vidas di B    Vidas