Vidas del ms. B
Raembaut de Vaqeiras
1 Raembautz de Vaqeiras si fo fills d’un paubre cavallier de Proenssa, del castel de Vaqeiras, que avia nom Peirobs, et era tengutz per fol. 2 En Raembautz si·s fetz ioglars et estet lonc temps ab lo prince d’Aurenga, et el li fetz gran ben e gran honor, e l’enansset e·l fetz conoisser e prezar a las bonas gens. 3 E venc s’en a Monferrat a meser lo marques Bonifaci. 4 Et estet en sa cort lonc temps. 5 Et crec se de sen e d’arnes e de trobar. 6 Et enamoret se de la seror del marques que avia nom ma dompna Biatritz, que fo moiller d’En Haenric del Carret. 7 E trobet de lieis maintas bonas chanssons. 8 Et appellava la en sas chanssons «Mos Bels Cavalliers». 9 E fo crezut q’ella li volgues gran ben per amor. 10 E qand lo marques passet en Romania, et el lo menet ab si e fetz lo cavallier. 11 E donet li gran terra e gran renda e·l regesme de Salonich. 12 E lai moric.
Testo: Ornella Damiano, Rialto 15.iv.2005.
Ms.: B 99r.
Note: Biografia di cui la tradizione manoscritta fornisce una versione comune ai codici ABEIKN2RSgaa1 ed una versione interpolata tradita dal solo P.
[OD]