Vidas del ms. B

Uc de Saint Circ

1 N’Ucs de Saint Circ si fo de Caersin, d’un borc qui a nom Tegra; fills fo d’un paubre vavassor que ac nom N’Arcman de Sain Circ, per so qe·l castels don el fo a nom Saint Circ, q’es a pe de Sainta Maria de Rocamador, que fo destruitz per gerra e derrocatz. 2 Aquest N’Ucs si ac gran ren de fraires maiors de si. 3 E volgron far clerc, e manderon lo a scola a Monpeslier. 4 E qand il cuideron q’el apreses letras et el apres chanssons e vers e sirventes e tensons e coblas, e·ls faitz dels valens homes e·ls ditz que eron adoncs ni que eron estat davan et ab aqest saber el s’enioglaric. 5 E·l coms de Rodes e·l vescoms de Torena lo leveron mout a la ioglaria, ab los vers et ab las coblas et ab las tenssons que ill feron ab lui. 6 Lonc temps estet ab la comtessa de Benauges, e per lieis gazaignet l’amistat d’En Savaric de Malleon, lo cals lo mes en raubas et en arnes. 7 Et estet lonc temps ab el en Peitieus et en las soas encontradas; e pois estet en Cataloigna et en Aragon et en Espaigna ab lo bon rei Amfos d’Aragon, et ab lo rei Peire. 8 E pois s’en venc en Proenssa et estet ab los barons, e pois en Lombardia et en la Marca Tervisana. 9 E pres moiller en Tervisana gentil e bella. 10 Gran ren apres de l’autrui saber, e volontiers l’enseignet ab autrui. 11 Assetz fetz de bonas chanssons e de bons vers e de bonas coblas e bons sons. 12 Et anc non fo gaires enamoratz, mas el se Feignia enamoratz. 13 E ben saup alevar las soas dompnas e ben decazer qand el lo volia far ab los sieus vers et ab los sieus digz.

Vidas di B    Vidas