Canzoniere di Wolfenbüttel     22.
		[A] tuich cil vol, [qu’a]mon preç, far saber
		que sens Deu n’es preç ni valor ni sen,
		eç a tuich cil que dixiran plaçer,
		que nus non pot sens Deu eser gauden,
5		que·l ioi sens Deu sun dol et mar[r]imen,
		blasme lo preç e·l plaçer angosos,
		ira·l solaç e·l deport doloros.
		Et pois nuls bens non val sens Deu un gan,
		quascuns am Deu, serva·l sens tot engan.
10		[T]ot autres ren metan a non-caler,
		sol Deu servir eç onrar francamen,
		que se·l sen toç et l’engens e·l saber
		et tot los froç fos en un solamen,
		non pogra ges un ior estar viven
15		oltra·l plaçer de Deu, tan fos gignos.
		Questas vertus nos pon far ioios:
		sperança, fes, almosnas, que merman
		van los peccaç et los ben tra’ enan.
		[E]t per aiço, cil que laus vol aver
20		e·l ioi ternal da Deus omnipoten,
		de mals obrar se devon remaner
		qet pel ben far smendon sos falimens.
		Cel qu’ama Deu, Deus l’ama per un cens
		et per un ben, cent mil rent gierdons
25		et quant caçon en sas ofesions
		et no·s mendon, dels tormes qu’il auran
		no·us pogran dir la mietaç en un an.
		[L]o reprocier qu’ai auçit es ben ver,
		que per niens es fol qui dan non sen.
30		Fols es e faiç cil qu’an de far poder
		lor pros et fan lor dans a esien.
		Cil qu’atendon al mon fan aisemen,
		que lor mals [fan] et lor ben baison ios.
		et de ben far son ades oblidos,
35		et cels peccaç van toç tems remenbran;
		ia mais ioios un sol ior non seran.
		[A]ilas, per que desiron tant l’aver
		e·l ioi del mon, que tant tost vai cum ven?
		Ben que mils an degeson permaner
40		en [a]quest siegle sabria·l nien.
		Quant de la mort aprosma lo prexen,
		lo plus ardiç fas senbrar temeros.
		Las cil que van pel chamin doloros!
		No·l credon ges la gens, n’en fan senblan.
45		Deus lor recort e·l remir lor talan.
		[T]an se volon de lor cors cars tener,
		que nul non fan de l’armas pensamen.
		Mout sun gariç qui Deu sa retiner,
		qu’e[n] senpretern eron de placer plen;.
50		et per aiço iong mas mains umelmen,
		et prec Iesus lo segner glorios,
		qu’aia merces et pietaç de nos
		e·n defenda de sas ofensas gran,
		si cum fes dal venen san Iohan.

Testo: Verlato 2002. – Rialto 20.xii.2004.

Traduzione

Poesia religiosa    Wolfenbüttel