Legenda aurea
[31] Sanh Johan Porta Latina
Sanh Johan Porta Latina fonc glorios apostol et evangelista, e domentre que predicava hun dia en Epheso, lo mager de la viala fes lo penre e dis li que adores1 las ydolas. E quant vi que non ho volia far, mes lo en carcer, e trames letras al emperador, e mandet li que el avia pres hun home que era encantayre, e mespresayre2 de las ydolas, e gran amic del Crucifiat. E quant l’emperayre ausi aysso, comandet que hom lo·lh tramezes a Roma. E tantost que fonc a Roma, per mays d’anta e d’isquern trays li hom totz los pels del cap. Et apres mes lo3 hom davan la porta de Roma que avia nom Latina, en hun cubel ple d’oli bolhen, am gran foc que avia desotz lo cubel. E quant fonc ins, per miracle de Dieu no·n /58b/senti hanc negun mal del mon, mas que yssi d’aqui4 per voluntat de Dieu. E tantost li crestia feyro far aqui una gleya ad honor de luy, en laqual hom fa cascun an gran festa de luy, ayssi coma se agues pres aqui martire. E quant l’emperayre Domicia vi que per luy no·ys layssava de predicar lo nom de Jesu Christ, fes lo yssilhar de Roma en una yrla que a nom Pathmos.
E quant la mayre de sanh Johan ausi dire que son filh era pres a Roma, ac gran dolor. E venc lo veyre. E quant fonc a Roma, ausi dire que yssilhatz l’avia hom lonh d’aqui, en una yrla que avia nom Pathmos, e quant ela ho ausi, tornet se·n. E quant se·n tornava, que fonc en una cieutat que ha nom Betolona, estet rescondut molt gran temps. Et apres mols ans, lo sieu cors fonc revelat ha son filh sanh Johan. Et adonc el venc e trobet lo5 sieu cors, que olia may que nulhas specias e mielhs que nulhas flors, e portet l’en en sa viala, am mols de miracles que son cors ac fachs, e fes lo sebelhir onradamen.
Testo:
Monika Tausend, Die altokzitanische Version B der
«Legenda aurea» (Ms. Paris, Bibl. Nat., n. acq. fr. 6504), Tübingen, Niemeyer,
1995 (Beihefte zur Zeitschrift für romanische Philologie, 262),
pp. 151-152. – Rialto
7.ix.2002.
[pdl]
