Legenda aurea

[43] Sanch Leo

Sanh Leo fonc apostoli. Endevenc se que hun dia, quant cantava la messa, que una dona sancta li bayet la ma a la proferta, ayssi que gran temptatio li venc d’aquela dona, que·l diable ho procuret. E quant el ho vi, trenquet se /65b/la ma que la dona avia baysada. Ayssi que·l poble murmuret quar el non cantava las messas coma solia, ayssi que sanh Leo preguet Nostra Dona e mes se en oratio. E cant ac preguada Nostra Dona hun gran tems, et ela li aparec, et aportet li una bela ma, e mes la·lh e la ma el loc de l’autra que avia trenquada, e dis li que cantes sas messas coma avia acostumat, ayssi que quant venc l’endema, sanh Leo mostret a tot lo poble la ma que la mayre de Dieu li avia reduda.

¹Et endevenc se que hun mals hom que avia nom Atila garrejava aquela terra, ayssi que sanh Leo se mes ·iij· dias e ·iij· nuechs en oratio. Et apres el dis al poble que·l seguis qui·s volria, quar el volia segre contra aquel. E tantost coma aquel home vi sanh Leo, descendet del caval, e gitet se a ssos pes, e demandet li perdo, e dis li que·l demandes tot quant volia. Et sanh Leo demandet li que non garrejes plus aquela terra e que laysses anar totz los crestias que avia pres ni qui ero en carcer, et autriet ho. E quant ho ac fach, sas gens escarniro lo quar avia obesit ad home senes poder. Et el respos lor que el ho avia fach per son profiech e per lo lor, /65c/«quar, so dis, ieu vi estar costa luy hun cavalier am l’espasa tracha, que·m dis que se ieu non obesia a luy del tot, que el mi auciria e totas mas gens. E per so ieu li ay obesit».

Quant sanch Leo ac viscut gran temps, et el mori en bonas obras e sanctas. Et el redet l’arma a Dieu.

Testo: Monika Tausend, Die altokzitanische Version B der «Legenda aurea» (Ms. Paris, Bibl. Nat., n. acq. fr. 6504), Tübingen, Niemeyer, 1995 (Beihefte zur Zeitschrift für romanische Philologie, 262), pp. 169-170. – Rialto 7.ix.2002.

[pdl]

Prosa religiosa    Legenda aurea

[42] Sanch Gervays    [44] La Nativitat de sanch Johan Babtista