Legenda aurea
[60] Sanch Simplici
/99d/Sanh Simplici e sanch Fausti foro frayres. E Dioclesia l’emperayre fes los duramen tormentar quar no volian adorar las ydolas, [... no volian adorar las ydolas,] fes los descapitar e·ls corces de lor gitar el fluvi, ayssi que lor sor1, que avia nom Beatris, gitet lors2 corces del fluvi e sebelhi los onradamen.
E quant lo prebost del emperayre ho saup, pres la e dis li que adores las ydolas. E quant vi que non ho volia far, fes aucir de nuech ha sirvens. Et adonc sancta Lucina, virgis, pres lo sieu cors e ssebelhi lo costa los sieus frayres onradamen.
E quant venc l’endema, lo prebost fes grans covitz en l’ostal de sanh Simplici e de son frayre e de la sor. Et hac hy ganre de gens. E cant manjavo, hun efan que tetava era en la fauda de sa mayre, e levet se davan totz, e cridet e dis: «Prebost, tu as mortz los sanhs e lor sor a tort, per que sapchas que breumen ho compraras!» Ayssi que lo prebost tremolet totz, e quant no·ys gardet, lo diable3 /100a/intret li el cors, e tormentet tant que a taula davan totz mori. E quant los autres ho viro, convertiro se totz a Dieu.
Testo:
Monika Tausend, Die altokzitanische Version B der
«Legenda aurea» (Ms. Paris, Bibl. Nat., n. acq. fr. 6504), Tübingen, Niemeyer,
1995 (Beihefte zur Zeitschrift für romanische Philologie, 262),
pp. 244-245. – Rialto
7.ix.2002.