Legenda aurea
[63] Sanch Stephe
Sanh Stephe, papa, coma agues convertitz mols gentiels per paraula e per yssimple et agues sebelhitz mols cors de sanhs, el fonc serquatz per En Valeri e per En Gallia en l’an de Nostre Senhor ·ijc·xl·1, per so que·l fezesso2 sacrifiar a las ydolas, ho que·l tormentesso, e feyro aytal establimen que totz hom que lor mostres agues lo sieu thesaur; e mantenen detz preveyres ne foro pres e decollatz, e·l ·vj· dia, lo papa fonc pres e fonc menat el temple de Mars, per so que adores las ydolas e que receupes sententia de mort, mas quant el fonc intratz el temple, mantenen una partida del temple tombet, e tota la gen fugi per paor que agro, et el anet se·n el cemiteri de Sancta Lucia. E quant ho saup En Valeria, trame a luy mols cavaliers que·l prezesso, e trobero lo messa cantan. E quant ac dicha la messa, els /103d/lo degolero en la sua gleya.
Testo:
Monika Tausend, Die altokzitanische Version B der
«Legenda aurea» (Ms. Paris, Bibl. Nat., n. acq. fr. 6504), Tübingen, Niemeyer,
1995 (Beihefte zur Zeitschrift für romanische Philologie, 262),
pp. 252-253. – Rialto
7.ix.2002.
[pdl]
