Legenda aurea
[65] Sanch Sist
Sanh Sist fonc dels primiers paguas philosofes, e desamparet1 aquela ley, e tornet se·n a Dieu, e fonc fach apostoli, e quant Dessi l’emperayre ho ausi, fes lo a ssi venir am ·ij· diagues e dis li que sacrifies2 a las ydolas se no volia morir a mala mort. E quant l’emperayre vi que non volia adorar las ydolas, fes lo metre en carcer.
E quant hom l’en menava, sanh Laurens seguia lo detras e pregava lo que non desampares per re la fe de Dieu. Et sanh Sist respondia que non faria ga e desia ha sanh Laurens que pres lo sieu thesaur, tot /107b/aquel des als paupres. Et adonc l’emperayre comandet que hom menes al temple sanh Sist e se non volia adorar las ydolas, que hom l’aucizes. E quant hom lo·lh amenava, sanh Laurens seguia lo detras e desia li: «Payre, non volhas per neguna re Dieu renegar. Car ieu ay donat tot ton thesaur3 als paupres». E quant li cavalier [que] menavo sanch Sist ausiro que tot lo thesaur de sanh Sist era donatz als paupres, preyro sanh Laurens, e menero lo en carcer, e tolgro lo cap ha sanch Sist et als ·ij· diagues; e las lors armas aneron se·n en paradis.
Testo:
Monika Tausend, Die altokzitanische Version B der
«Legenda aurea» (Ms. Paris, Bibl. Nat., n. acq. fr. 6504), Tübingen, Niemeyer,
1995 (Beihefte zur Zeitschrift für romanische Philologie, 262),
p. 260. – Rialto
7.ix.2002.
[pdl]
