Legenda aurea
[79] Sanch Theodori
Sanh Theodori sufri passio en la cieutat de Martinia sotz En Dioclesia et En Maximia, emperadors, e coma lo prebost dices a sanh Theodori que sacrifiques a las ydolas e que tornes en sa cavalaria, sanch Thedori respondet e dis: «Ieu cavalgaray am lo mieu Dieu et al sieu Filh Jesu Christ».1Adonc dis lo prebost: «A y filh, e poyria lo ieu veser?» Et sanh Theodori respondet que hoc, «e poyrias anar am luy se·t volias».
En apres mandet a sanh Theodori que sacrifiques a las ydolas, per que sanch Theodori intret una nuech el temple d’En Mars et am foc el cremet lo temple. E cum ne fos acusatz, lo prebost lo fes metre en una carcer per so que aqui moris de fam. Mas Jesu Christ li aparec, que·l dis: «Ajas speransa en me, sirven mieu, quar soy am tu». Et adonc vengro grans companhias de baros vestitz de blanc, que lausero Dieu am luy, e quant los viro las gardas, espaoridas fugiro.
En apres sanh Theodori fonc trah de la carcer, e fonc li mandat que sacrifiques a las ydolas, per que el dis: /128c/«Se·m cremavas e·m turmentavas en diverses turmens, ieu non renegaray lo mieu Dieu», per que lo prebost lo fes pendre en hun pal e·l fes tot escorgar am arpas de fer. Et apres el dis: «Vols esser am nos, Theodori, ho am lo tieu Christ?» Et sanh Thedori li dis: «Ieu so et seray am lo mieu Christ, que es lo mieu senhor», per que lo prebost lo fes metre en hun foc. Et aqui el trames a Dieu lo sieu sperit.
Testo:
Monika Tausend, Die altokzitanische Version B der
«Legenda aurea» (Ms. Paris, Bibl. Nat., n. acq. fr. 6504), Tübingen, Niemeyer,
1995 (Beihefte zur Zeitschrift für romanische Philologie, 262),
p. 317. – Rialto
7.ix.2002.
[pdl]
