Legenda aurea

 

 

 

 

[8] Sanh Fabia

 

Sanh Fabia fonc cieutada de Roma, e quant lo papa fonc mort, lo poble si ajustet per eligi hun autre entr’els, entre losquals venc Fabia, que volia veyre l’ordenamen que volian far. Et una columba blanca devalet del cel e pauset se sobre lo cap de sanh Fabia. E quant lo poble ho ac vist, demantenen elegiro en papa sanh Fabia. E sanh Fabia trames ·vij· diagues per totas las regios del mon e mandet que ·vij· subdiagues anesso am els e que scrivesso las vidas e las passios dels martirs.

Sanh Fabia contrestet am Felip, emperador, que volia cumerguar en la vigilia de Paschas. E may li demandet que non intres e la gleya entro que agues cofessat sos pecatz, per que lo fes estar foras las portas de la gleya tro que ac cofessat.

Sanh Fabia sufri passio en l’an de Nostre Senhor que contava ·c·c·liij·1 e fonc coronat per martiri, que perdet lo cap.

 

 

 

Testo: Monika Tausend, Die altokzitanische Version B der «Legenda aurea» (Ms. Paris, Bibl. Nat., n. acq. fr. 6504), Tübingen, Niemeyer, 1995 (Beihefte zur Zeitschrift für romanische Philologie, 262), p. 63. – Rialto 7.ix.2002.


[pdl]

Prosa religiosa    Legenda aurea

[7] Sanh Alari    [9] Sanh Sebastia