I.

1. Amar dei,
2. que ben es mezura,
3. lanquan vei
4. lo tems en verdura
5. e l’aura es dousana
6. e refrinh lo chans pels plais
7. que l’auzels demena,
8. e·ill nueitz aserena
9. e floris la mora.

II.

10. Dunc dompnei
11. color en peintura,
12. mas be vei
13. en plan ma rancura,
14. cui sa dona enguana
15. tan no·s pagua ni s’irais
16. que ja l’en sovena,
17. d’elh amor terrena,
18. soven chant’e plora.

III.

19. Ges no·l vei
20. que sa forfaitura
21. no·ill plaidei
22. tot per nueit escura
23. ab leis ses luguana
24. mas, la·m vailla Dieus, la bais,
25. gardan de mal plena
26. que·l plait destremena
27. e d’als non labora.

IV.

28. L’aer correi
29. quesc om folatura;
30. leis non grei,
31. si·ls veils quers pejura
32. .  .  .  .  .  .  .  .  .  .  . 
33. lassa, que·s fara jamais?
34. Tan greu cuj revena,
35. tant ha blava vena,
36. cuns veillums langora

V.

37. Leis mercei
38. d’eisa sa tortura,
39. senhorei
40. si vas mi·s meillura,
41. on es tant trefana
42. pero ges ieu no·m n’esmai
43. del ben que·m n’avena,
44. gen baizan m’estrena,
45. de que m’asenhora.

VI.

46. Lonc eslei
47. fis d’amor segura
48. cui m’autrei,
49. tant es fin’e pura,
50. grail’e grass’e plana
51. que dedins lo cor me trais
52. gran ir’e greu pena
53. ab joi que·i amena
54. que jamais no·i fora.

VII.

55. Non a rei
56. el mon, tan com dura,
57. meils estei,
58. ric’e de mezura
59. e d’onor certana,
60. ab sol una vetz que·m bais
61. e no, ses contena,
62. mai s’amor retena.
63. No sei quant ho cora.