I.

1. Veillz Cumunal plaides,
2. ver breviat lo corves!
3. E·ill malvaz serventes
4. que vos auch far e dir,
5. me tornon en azir,
6. e·ill vostra janglosia,
7. don vos faiz escarnir,
8. me desplaz chascun dia,
9. e·m n’es vos enoios:
10. que limars d’esperos,
11. gals esems e falcos
12. am mais auzir que vos.

II.

13. Mas sobrebe vos pres
14. car viella vos volges;
15. c’ab autra foraz mes
16. e fera·us greu soffrir.
17. E non a obs que·us tir,
18. tossa, sa drudaria,
19. se ja se·n vol jauzir;
20. que no se·n jauziria,
21. c’outra doas messos
22. non auria drut de vos;
23. e de nulla·l janglos
24. no sera ja cogos.