Gaucelm Faidit

I.

L’onratz iauzens sers,

on ab bela parvensa

venc mos bos espers

gen complir m’entendensa,

mi torn’en plazers

ab doussa sovinensa

e·m fai chansos faire,

don me cuiav’estraire,

quar ben es razos

qu’ieu chan guays e ioyos,

quar silh cuj suj amaire,

qu’es la genser qu’anc fos,

vol mi e mas chansos.

II.

Que·l sieus gentils pros

cors cortes, de bon aire,

francs e cars e bos,

humils e d’aut afaire,

e·l huelh amoros,

que·m saubon lo cor traire,

e sa bevolensa,

don soplei vas Proensa,

m’an tan aut aders

que rics suj et enders,

sol nostra benvolensa

sia complitz lezers,

que no·i falha poders.

III.

Quar adreitz sabers

e valens conoissensa

et humils parers

e pretz ab gran valensa,

honrars, gens teners

son en lieys don m’agensa;

e·n suj guays chantaire

per sa valor retraire

e grazisc los dos

e·ls plazers saboros

e·l afan, qu’ie·lh vi traire

al grieu comjat doptos,

de sospirs anguoyssos.

IV.

Per so·i tanh perdos,

quar tardiei pauc ni guaire

de tornar coitos

vas lieys en son repaire,

don de ginolhos

li suy leyals preyaire

que merces la·m vensa

e·m perdon la falhensa;

qu’onors ni jazers

ni baizars ni teners

no·m ten sai ni·n bistensa,

doncs no·l sia temers

que·s camge mos volers.

V.

Pero si·l movers,

qu’ai fag per penedensa

lai on Dieus lo vers

pres veraya nayssensa,

l’es al cor dolers,

no·l deu aver tenensa,

qu’a tot bon veiaire

es dels bos pretz lo maire

qui sans deleichos

vai al rey glorïos

servir, qu’es vers salvaire,

qu’el cel e sa ios

n’er rics lo guazardos.

T.

Na Maria, vos

etz tant bella e pros

qe non es emperaire

el mon, que non fos

onratz els vostres dos.

VI (strofa alternativa a T, ms. a1).

Oimais es sazos

d’anar am Dieu lo paire.

Qi pres mort per nos,

[nos] sia chapdelaire

ez als compaignos,

qi son nostre cofraire

per obedïenza

(aid’er me lor crezenza!);

e·us cors e·us avers,

c’an el sieu servir ders,

teinha en sa prezenza

e·il sia douz vezers

l’afanz e·l mals parsers.