Gaucelm Faidit

I.

Tant suj fis e ferms vas amor,

que ia per mal qu’ie·n sapch’aver,

no·n partrai lo cor ni·l voler;

que·l mal e·l ben tenh ad honor,

quar tuit li mei afar maior

son en celar et en temer

vos, dona, don no·m tuelh ni·m vire,

ans vos am e·us vuelh e·us esper

et on mais n’ai, plus fort sospire

e plus muer, car no·us puesc vezer.

II.

Doncs, ben greu puesc vius remaner,

qu’ieu no·us vej gaire ni vos me;

e qui so que ama no ve

no pot de peior mal iazer.

Pero mout soven m’alezer

en un bel plazer que·m reve,

qu’ab los huelhs del cor vos remire,

car aquels non part ni·n refre,

ans suj de mos bels ditz servire,

de bon cor et ab leyal fe.

III.

Tan vos am qu’autra no·m rete,

ans suj per vos en tal error

cum aisselh qu’a mal de calor,

don setz non pot partir per re

et on plus beu, plus a ab se

voluntat de beur’e ardor;

atressi on eu plus cossire,

de vos ades n’ai cor melhor,

et on mais n’ai, mais en dezire

e meils m’a·l iois dousa sabor.

IV.

E pus tan leyal amador

m’avetz, belha dona, en ver,

plassa·us que·m deia escazer

qu’afranquetz tan vostra valor

que no sofratz mais preyador

mas me, cuj fatz viur’e valer.

Viure·m faitz e fazetz m’aucire

ad amor, quar m’a em poder,

mas de tot suj leyals sufrire:

e ve·us me al vostre plazer!

V.

A! Cum fui d’esforciu voler

quan me mis en vostra merce;

que aja·n mal o aja·n be,

res no·m pot del maltrait mover,

que·l mals m’auci e·m fa doler

el bes, quan l’ay ne·l ioys m’en ve,

si be·m plai plus qu’ieu no sai dire,

pueys aqui mezeis m’esdeve

qu’ieu torn en aquelh eis martire,

quar totz temps aquel ioys no·m te.

VI.

Hueimais vir mon chant – e·s cove –

ves l’afar de nostre Senhor,

don tuit avem gran desonor:

que la falsa gens que no·l cre

lo dezerete ni·l malme

de lai on pres mort e dolor.

Quasqus tanh, de l’anar cossire,

e·l princep, si cum son aussor,

q’us non l’es fizels obezire,

si d’aqest afar no·l socor.

VII.

Al comte mo senhor vuelh dire

qu’aissi cum ac primiers l’onor,

guar qe Dieus li sia grazire,

qu’al passar comt’om la lauzor.